Новите кредити – со пониска камата

Добивај вести на Viber

Банките одобруваат кредити со намалена камата, додека каматната стапка на депозитите останува непроменета. Најновите податоци на Народната банка покажуваат дека во мај просечната камата на новоодобрените кредити изнесува 6,7% додека во април таа изнесувала 7%. Новата, намалена камата за новоодбрените кредити е на најниско ниво во последните пет месеци. Анализата на бројките покажува дека во мај се забележува намалување на каматата за новоодобрените денарски кредити додека кај оние со девизна клаузула има мал пораст. Висина на каматна стапка  Денарски кредити 6,7% Девизни кредити 6,6% Во истиот месец, банките ги зголемија каматите за штедењето во денари, додека за девизните депозити тие остануваат на исто ниво. Така, во мај, за новопримените штедни влогови во денари, банкарите пресметувале камата од 2,6% (во април 2,2%), додека за девизните депозити таа изнесувала 0,5% (ова ниво се одржува три месеци по ред). Додека кај новообрените кредити се забележува тренд на поевтинување, кај постоечките кредитни пласмани, состојбата е непроменета. На ниво на целиот банкарски сектор, висината на каматната стапка за денарските кредити изнесува 8,1% а за девизните кредити 6,6%. Банкарите најавија дека натамошните можни поевтинувања на кредитите ќе бидат диктирани од вкупната економска состојба во земјава. И покрај тоа што Народната банка и Владата ја намалија основната камата за благајничките, односно државните записи, со цел да го стимулираат кредитирањето, банките и натаму продолжуваат со воздржана и претпазлива кредитна политика. Во првите четири месеци од годинава на ниво на банкарскиот сектор беше регистриран кредитен раст од 1 отсто. До крајот на годината, според проекциите на НБРМ кредитирањето треба да порасне со стапка од 7 проценти. Редакција Фактор