Ново задолжување: На Владата и требаат 63 милиони евра!
Објавено во: Финансии 12 Октомври, 2013
По еднонеделно затишје, во вторник, на 15 ти октомври владата повторно ќе се задолжува на домашен терен. Преку две аукции на државни записи и една аукција на државна обврзница, ќе се обиде да обезбеди скоро 63 милиони евра од домашните кредитори.
Според веќе објавените податоци, најголем дел од парите, или 60,6 милиони евра ќе треба да се обезбедат преку продажба на краткорочни хартии од вредност за кои се нуди камата од 3,15 % односно 3,60%, во зависност од валутната клаузула. Обврзницата, со рок на доспевање од 5 години ќе се понуди со купонска камата од 4,60%.
Последното задолжување на домашен терен се случи на 1 во октомври кога државата планираше да обезбеди 77 милиони евра, но на крајот од денот се задолжи со скоро 115 милиони евра, или 40 тина милиони евра повеќе од првичниот план.
Министерството за финансии веќе најави дека Владата ќе се сврти кон задолжувањата од домашните кредитори и дека овој извор ќе биде клучен за финансирање на продлабочениот буџетски дефицит од 3,5% на 3,9% од Бруто Домашниот Производ.
Д.А.