ОПШТИНИТЕ НЕ УСПЕАЈА ДА ИЗДАДАТ ОБВРЗНИЦИ – дали ќе им тргне од рака со новата власт

Добивај вести на Viber

Комисија за хартии од вредност во последниот годишен извештај објави дека во текот на минатата година во земјава функционирале вкупно 5 друштва за управување со отворени и затворени инвестициски фондови кои управуваат со 22 отворени инвестициски фондови.

-  Вкупната нето вредност на средствата на отворените инвестициски фондови со кои управувале друштавата на крајот на 2023 година изнесувала 13.449.745.391 денари, што во однос на 2022 година е зголемување од 21,75 отсто на годишно ниво или 39,07 милиони евра.  За период од пет години или крајот на 2019 година има раст од 55,89 проценти, или 78,41 милиони евра – соопштуваат од Комисијата за хартии од вредност.

Од комисијата објавија дека во текот на минатата година на примарниот пазар на капитал доминираа емисии на сопственички хартии од вредност или акции. Во однос на должничките хартии од вредност, општина Штип и општина Аеродром иако добија од Комисијата одобрение за издавање на општински обврзници, истите не ги реализираа, бидејќи општините согласно Законот за јавен долг не добија одобрување и од Владата, па не се реализираа.

Укажуваат оти во текот на минатата година вкупната вредност на одобрени емисии на акции изнесувала 3.724.694.177 денари или 60.441.472,48 евра. Притоа нагласуваат дека одобрениот износ на емисии на акции во 2023 година бележи намалување за 28,74 отсто во однос на 2022 година, или за 27,99 проценти во споредба со 2021 година. Од друга страна има зголемување за 73,17 отсто во однос на 2020 година и за 20,15 проценти во однос на 2019 година.

Притоа во текот на минатата година најголем дел од друштвата кои се јавиле како издавачи на акции се од секторот финансии и тоа осум друштва, и уште две друштва се друштва од областа на стопанството. Од секторот финансии две се банки, три се друштва за осгирување, две друштва за управување со пензиски фондови и една брокреска куќа.

Притоа податоците на Комисијата за хартии од вреднсот откриваат дека најголем дел од вредноста на издадените акции оптаѓа на банките и другите друштва од финансискиот сектор.

Исто така може да се забележи дека во 2019 по бројност акционерските друштва од областа на стопанството издавале повеќе акции, но вредноста на издадените акции секогаш е поголема кај банките и друштвата од финансискиот сектор. Од 2020 година и по бројност и по вредност доминираат акциите издадени од банките и друштвата од финансискиот сектор.

Од Комисијата посочуваат дека минатата година и беше издадено одобрение на Универзална Инвестициона Банка за издавање на долгорчни хартии од вредност по пат на приватна понуда – трета емисија на 1.350 перпетуални обврзници со поединечна номинална вреднсот од 1.000 евра и вкупна номинална вредност од 1.350.000 евра. Притоа посочуваат дека продажната цена на овие обврзници беше еднаква на номиналната. Овој инструмент се користи како додатен основен капитал на банката, а средствата од емисијата се наменети за корпоративни цели.

Од комисијата укажуваат дека овој инструмет до сега го има користено само УНИ Банка, на која во 2022 година и беше издадена одобрение за втора емисија од 2.500 перпетуални обврзници со поединечна вредност од 1.000 евра. Овој тип на обврзници за прв пат е издаден во Македонија во 2019 година и тоа од страна на УНИ Банка, кога всушност издаде обврзници во врднсот од 5 милиони евра.