Османи вели дека е побарано згрижување на 750 Авганистанци
Објавено во: Македонија 26 Август, 2021
Шефот на македонската дипломатија, Бујар Османи вели дека досега бројката за згрижување авганистански цивили е 750 лица.
Објаснува дека таа бројка флуктуира, но секогаш е во рамките на можностите.
„Како се зголемува бројот на барања групата во рамки на Владата прави проценка во која што се имаат предвид сите аспекти и логистички, и безбедносни и здравствени и сите можни аспекти за коишто имаат надлежност институциите коишто се присутни во таа група и врз основа на тоа ги потврдуваме или не ги потврдуваме барањата“, рече Османи.
Тој додаде дека досега комуникацијата по однос на барањата за згрижување одеше преку нашите партнери, нашите сојузници и невладините меѓународни организации коишто работеле заедно со нашите партнери и заедно со нашата војска во текот на 20 години ангажман во Авганистан.
„Имаше една група на пример која што требаше да дојде во државата која што замина за Катар, меѓутоа отпосле сменија дестинација, наместо во Македонија во друга држава. Така што се менува ситуацијата“, вели шефот на дипломатијата.
Министерот за внатрешни работи, Оливер Спасовски вели врвен приоритет е зачувување на безбедноста и стабилноста на нашите граѓани на државата, но и дека цивилите кои треба да пристигнат не се радикали.
Изминативе денови бројката варираше, и се спомена дека земјава ќе треба да згрижи 780 Авганистанци. Во регионот, Косово ќе прими 2.000, а Албанија околу 4.000.