Откажани половина од летовите на „Луфтханза“

Добивај вести на Viber

Германската авиокомпанија „Луфтханза“ денеска откажа околу 750 летови како последица на штрајкот на пилотите, кои започнаа дводневен прекин на работата поради долгорочниот спор со управата околу предвременото пензионирање, јавуваат германски медиуми.

Откажани се повеќе од половина од вкупно 1400 предвидени слетувања и полетувања на авионите на аеродромот во Франкфурт и Минхен, на кратки домашни и европски линии, што ќе погоди околу 80 000 патници, изјавил портпаролот на „Луфтханза“.

Летовите на „Луфтханзините“ ќерки „Германвингс“, „Јуровингс“, „Свис“и „Аустралиан ерлајнс“ не се погодени од штрајкот.

Синдикатот на пилотите на „Луфтханза“ најави дека штрајкот ќе биде на силиа и утре, па освен домашните и европските летови, ќе бидат погодени и прекуокеанските летови и транспортниот сообраќај.

Ова е 12-ти штрајк од април минатата година, организиран поради планот на администрацијата на авиокомпаниите да ги укине прописите според кои пилоти можат да се пензионираат на 55 години, а потоа да добијат и до 60 отсто од платата, додека не наполнат 65, кога според германскиот закон имаат право на пензионирање.