ОТКРИЕНО ШТО ПОСТИГНАА АМЕРИКАНСКИТЕ НАПАДИ НА ХУТИТЕ - Одговорот е: Не многу, а одмазда се спрема

Добивај вести на Viber

Воздушните напади предводени од САД во четвртокот и петокот против локациите под контрола на Хутите во Јемен оштетија или уништија околу 90 отсто од погодените цели, но групата задржа околу три четвртини од нејзината способност да истрела проектили и беспилотни летала врз бродови кои транзитираат по Црвеното Море, изјавија во саботата двајца американски официјални претставници.

Проценките на штетите се први детални проценки на нападите на американските и британските напаѓачки авиони и воени бродови на речиси 30 локации во Јемен и ги откриваат сериозните предизвици со кои се соочува администрацијата на Бајден и нејзините сојузници додека се обидуваат да ги одвратат Хутите, и да ги обезбедат критичните бродски рути меѓу Европа и Азија, со цел да се спречи ширењето на регионалниот конфликт, пишува Њујорк Тајмс.

Висок американски воен офицер, генерал-полковник Даглас Симс, директор на Здружените сили на Генералштабот на армијата, рече дека нападите ја постигнале својата цел да ја оштетат способноста на Хутите да извршат извесен тип на напад.

Но, двајца американски функционери предупредија дека дури и по погодување на повеќе од 60 цели на проектили и беспилотни летала со повеќе од 150 прецизно наведувани муниции, нападите оштетија или уништија само околу 20 до 30 отсто од офанзивните способности на Хутите.

Двајцата американски функционери разговараа под услов да останат анонимни за да ги изнесат внатрешните воени проценки.

Пронаоѓањето на целите на Хутите се покажува потешко од очекуваното. Американските и другите западни разузнавачки агенции не потрошија значително време или ресурси во последниве години за собирање податоци за локацијата на воздушната одбрана на Хутите, командните центри, складиштата за муниција и капацитетите за складирање и производство на беспилотни летала и ракети, изјавија официјални лица.

Сето тоа се промени откако Хамас го нападна Израел на 7 октомври и копнената офанзива на израелската армија во Појасот Газа. Хутите нападнаа комерцијални бродови кои минуваа низ Црвеното Море во знак на солидарност со Палестинците во Газа и рекоа дека ќе продолжат додека Израел не се повлече.

Првиот бран на американски напади погоди 60 однапред планирани цели на 16 локации со повеќе од 100 прецизно наведувани бомби и проектили. Околу 30 до 60 минути подоцна, беше извршен втор бран на напади врз уште 12 цели кои аналитичарите ги идентификуваа како закани за авионите и бродовите.

И покрај жестоката реторика и ветувањата за одмазда, воениот одговор на Хутите на нападите досега беше придушен: само една противбродска ракета падна безопасно во Црвеното Море, далеку од бродовите што минуваат, рече генералот Симс.