Ова се обвинетите за 27 април кои празниците ќе ги поминат во притвор
Објавено во: Македонија 27 Декември, 2017
На 23 лица обвинети за насилствата од 27 април им е продолжен притворот од 30 дена, на четири лица им е продолжен домашниот притвор, а на две лица мерката притвор им е заменета со куќен притвор.
Кривичниот совет на одделението за организиран криминал и корупција при Основниот суд Скопје 1 – Скопје постапувајќи по предлог на Основното јавно обвинителство за гонење организиран криминал и корупција, постапувајќи по предлогот за продолжување на мерката притвор и мерката куќен притвор за 29 лица, а во врска со настаните од Собранието од 27 април, донесе решенија со кои го прифати предлогот на обвинителството.
Советот донесе одлука Владо Јовановски, Игор Дуловски, Богдан Илиевски-Бетмен, заедно со Мумир Пепиќ од Агенцијата за разознавање, Оливер Радулов кој работел како агент во УБК, заедно со Сашо Марковски празниците да ги поминат во притвор. И прилепчанецот Јане Ченто ќе остане во притвор, заедно со Душко Лазаров, кој бил дежурен во оперативниот штаб и Елена Доцевска-Божиновска од кабинетот на поранешниот претседател на Собранието. Зад решетки остануваат и пратениците Љубен Арнаудов, Крсто Муковски и Сашо Василевски.
Куќен притвор добија пратеникот Јохан Тарчуловски и Жаклина Пешевска.
Против овие решенија дозволено е право на жалба до Апелациониот суд во рок од 48 часа по приемот на решенијата.
На 23 лица им е продолжен притворот од 30 дена, на четири лица им е продолжен домашниот притвор, а на две лица мерката притвор им е заменета со куќен притвор.