ПАДНА ДОГОВОР: Балтичките земји создаваат одбранбена линија на границата со Русија
Објавено во: Свет 19 Јануари, 2024
Балтичките земји создаваат одбранбена линија на границата со Русија.
Естонија, Летонија и Литванија постигнаа договор за создавање „одбранбена линија“ на границата со Русија. Министерството за одбрана на Естонија прецизираше дека договорот за создавање на оваа линија денеска во Рига го потпишале министрите за одбрана на трите земји.
„Балтичките земји се договорија за Балтичката одбранбена линија долж нивната источна граница. Од клучно значење е паметно да се искористи времето за да се зголеми одбранбената подготвеност“, се вели во соопштението на естонското Министерство за одбрана.
Земјите планираат наскоро да создадат одбранбена зона составена од различни објекти наменети за одвраќање и заштита од воени закани.
Естонскиот весник Postimes објави дека властите на земјата ќе изградат околу 600 бункери на источната граница за одбрана од евентуална закана од Русија.
Борис Писториус, германскиот министер за одбрана предупреди денеска за можноста од напади од Русија на земјите-членки на НАТО.„Речиси секој ден слушаме закани од Кремљ, во моментов сè повеќе се насочени кон нашите пријатели во балтичките земји. Мораме да сметаме на фактот дека Владимир Путин би можел да ги нападне и земјите-членки на НАТО“, рече Писториус во интервју за весникот Тагесшпигел.
НАТО ќе ги започне своите најголеми воени вежби во последните децении следната недела со околу 90.000 лица кои ќе учествуваат во неколкумесечните вежби кои имаат за цел да покажат дека Алијансата може да ја брани целата своја територија.