Паричната помош од 6.000 денари ќе стигне до уште 24 илјади граѓани - Законот за продолжување на рокот стигна во Собрание

Добивај вести на Viber

Откако банките не сакаа да попуштат и децидно ставија до знаење дека ќе им ги дадат шесте илјади денари на граѓаните кои не успеаја навреме да си ги земат само доколку пролонгирањето се стави во законска рамка, Владата сега носи закон со кој рокот за исплата на овие средства се продолжува до крајот на март.

Првично тоа го одлучи на владина седница, а сега скроила и дополнување на првичниот Закон за финансиска поддршка, со кој наместо 25 декември лани, сега финалниот рок е 31 март оваа година.

Пари треба да им се дадат уште на околу 24 илјади граѓани, од кои 22 илјади се оние кои не успеаја да ги ажурираат податоците, а околу 2.000 корисници се оние на кои им беа уважени приговорите. Нив од државната каса вкупно ќе им бидат исплатени нешто над 2,3 милиони евра.

Како што е познато, овој закон се однесува на давање на финансиска поддршка од по 6.000 денари на неколку видови на ранливи категории, и тоа граѓани со низок доход, корисници на пензија, корисници на право на социјална сигурност на стари лица, млади лица на возраст од 16 до 29 години, самохрани родители, деца без родители и родителска грижа, уметници и други лица кои вршат дејност во културата, филмски работници и естрадни уметници.

Притоа, досегашното законско решение предвидуваше примената финансиска поддршка од 6.000 денари корисниците да ја искористат исклучиво за купување на македонски производи и услуги, во периодот од денот на приемот на парите на трансакциска сметка до 25 декември минатата година.

Од Владата со свое правдање зошто не успеаја да ја доделат државната помош во рокот што самите во законот си го зададоа.

„Имајќи предвид дека со овој закон е предвидено финансиска поддршка да добијат повеќе категории на лица кои согласно првичните проценки изнесуваа околу 254.500 граѓани, а роковите за доставување на листите на корисници на финансиска поддршка од соодветните институции беше исклучително краток, доцнеше изготвувањето, објавувањето и доставувањето на Конечната листа на корисници на финансиска поддршка до банките. Дополнително, треба да се земе предвид и фактот дека станува збор за мерка која се имплементира на сосема нов начин, односно без аплицирање од страна на граѓаните, а со координација на голем број на државни институции и банки“, објаснуваат од Владата која е предлагач на законот.

Потоа, додаваат, доцнењето на изготвувањето на Конечната листа на корисници предизвикало и нејзино задоцнето објавување на веб страницата www.kupuvamdomasno.gov.mk, како и нејзино задоцнето доставување до банките.

„Поради тоа, а имајќи предвид дека средствата можеа да се искористат најдоцна до 25.12.2020 година, околу 22.000 граѓани кои добија финансиска поддршка а кои не ги ажурираа своите податоци во банките, како и 2.132 граѓани на кои им се  уважија приговорите, нема да можат да ја искористат оваа финансиска поддршка, доколку не се продолжи рокот за искористување на средствата“, се вели во владиното образложение и се нагласува дека токму од тие причини, сега и со закон ќе биде предвидено тој рок да се продолжи до крајот на март оваа година.

Владата во самиот нов закон наведува дека за исплата на финансиската поддршка на граѓаните кои до 25 декември не ги добија парите, во Буџетот на земјава за оваа година се обезедени 144 милиони денари, или 2,34 милиони евра.

Инаку, откако на 25 декември лани не успеја да им исплати пари на сите категории, Владата побара толеранција од банките

„Владата очекува од банките да бидат толерантни во наредните денови кон граѓаните, се додека заврши исплатата, бидејќи станува збор за најранливите граѓани, кои што се најпогодени од кризата. Владата прави се за помошта од 27,5 милиони евра да стигне кон граѓаните“, рече кон крајот на декември на пресконференција владиниот портпарол Душко Арсовски.

Но, на овој апел веднаш реагираа банкарите. Од нивната Македонска банкарска асоцијација рекоа дека за да продолжи исплатата, за тоа ќе мора да има законска покриеност. Односно, банките успеале да пуштат пари на околу 90 отсто од примателите на финансиска помош од 6.000 денари, а за да ги исплатат останатитите пари инсистираа на законски измени со кои ќе се поместат роковите во кои се дозволува исплата на помошта.

„Македонската банкарска асоцијација ја известува јавноста дека нашите членки – банките, како и досега,  подготвени се со сите свои ресурси да излезат во пресрет на проектите од јавен интерес, а посебно на оние кои се наменети за социјално ранливи категории граѓани. Притоа, секогаш активностите мора да бидат во рамки на законските прописи. Во таа смисла, после истекот на законски дадените рокови, за да се реализира исплатата на  сите граѓани на кои во претходниот законски рок не им беше исплатена финансиската поддршка, потребно е да се  направат измени на Законот за финансиска поддршка со цел постоечките рокови, да се заменат со нови подолги рокови“, стоеше во известувањето од МБА.

Оваа мерка беше дел од четвртиот сет од владините економски пакети.

Се уште не се знае дали ваква директна парична поддршка ќе има и во петтиот сет економски мерки, кои треба да им помогнат на граѓаните полесно да го преживеат ударот од ковид кризата во првиот квартал од оваа година.