ПЛАН ЗА ГАЗА: Што најави новиот палестински премиер?

Добивај вести на Viber

Како во иднина ќе функционира Газа, објасни новиот палестински премиер Мохамад Мустафа. 

Тој објави во вторникот во Рамала, на Западниот Брег, дека ќе назначи технократска влада и ќе формира независен фонд за надгледување на реконструкцијата на друга палестинска територија – Појасот Газа.

Минатата недела, палестинскиот претседател Махмуд Абас го назначи својот советник Мустафа, економист образован во САД, за премиер. Мустафа изјави дека ќе има „непартиска, технократска влада која може да ја добие довербата на палестинскиот народ и поддршката од меѓународната заедница“, ветувајќи големи институционални реформи и политика на „нулта толеранција“ за корупцијата. Тој рече дека ќе се обиде политички повторно да ги обедини палестинските територии на Појасот Газа, Западниот Брег и Источен Ерусалим и да создаде „независна, компетентна и транспарентна агенција за заздравување и обнова на Газа и меѓународно управуван фонд за собирање, управување и исплати на потребните средства“. Во неговите планови не се споменува Хамас, палестинската терористичка група која постигна убедлива победа последен пат во 2006 година, кога Палестинците одржаа национални избори. Хамас има силна поддршка од Палестинците ако се суди по анкетите. 

88-годишниот Абас остана на власт откако му истече мандатот во 2009 година и одби да одржи избори, наведувајќи ги израелските ограничувања. Анкетите постојано покажуваат дека огромно мнозинство Палестинци сакаат тој да поднесе оставка. Мустафа рече дека палестинската управа има цел да одржи претседателски и парламентарни избори, додавајќи дека тоа ќе зависи од „реалноста на теренот“ во Газа, Западниот Брег и Источен Ерусалим – територии заземени од Израел во војната на Блискиот Исток во 1967 година.

Мустафа изложи големи планови за ревитализација на Палестинската управа, на којашто повикуваат САД, како дел од својата повоена визија за решавање на конфликтот меѓу Израел и палестинското движење Хамас.

Но, Палестинската управа нема овластување во Појасот Газа бидејќи Хамас ја протера во 2007 година. 

Израелскиот премиер Бенјамин Нетанјаху отфрли какво било враќање на Палестинската управа во Појасот Газа, а израелската влада цврсто се противи на палестинската државност.

Хамас на 7 октомври лани го нападна Израел, со барање за формирање на независна држава Палестина со главен град Ерусалим.