ПЛАТАТА ЈА КРИЈАТ КАКО ЗМИЈАТА НОЗЕТЕ: Се бараат жени за чување деца во Германија, но „за повеќе инфо инбокс“

Добивај вести на Viber

Социјалните мрежи се идеални за наоѓање работници а посебно лесно се наоѓаат работници на црно. Има голем број групи во кои нашите кои живеат во Германија нудат работа за чување деца или помош во домот, но никогаш досега не се случило јавно да кажат за колкава плата бараат работници. 

Таквата ситуација секогаш ги револтира граѓаните кои се заинтересирани да аплицираат за работата, бидејќи, како што велат, секогаш платата е мала.

„Се нуди работа за чување двегодишно дете, услови нема, се бара жената да е од Македонија. И сега еве јас знам германски јазик, имам ЕУ документи, но и сум со педагошка факултетска диплома. Бидејќи морав да и пишам на жената што бараше работничка за да дознаам колкава плата се нуди, кога добив одговор се разочарав. Нуди плата од смешни 400 евра, со образложение дека јас немало да имам никакви трошоци, бидејќи и сместувањето и храната ми е од нив. Значи сакаат да заминеш во Германија да им чуваш дете, ама по македонски стандард. Значи нашите во странство не се водат по тамошниот просек за плаќање, туку по свои математики. Таа вели дека тие пари можеби нема да ги троши, но ќе ги прати дома на нејзините“ вели една жена која била заинтересирана да се пријави за работното место, која сакаше да остане анонимна.

Таа вели дека најчесто вака вработените работници немаат никакви права, малтретирани се, а често добиваат и други обврски „за тие пари“.

„Да не биде дека генерализирам, или дека зборувам само лошо, има и наши кои се прекрасни работодавци. На моја роднина која исто така замина да работи кај наши во Германија дури и помогнаа да остане во Германија и да си го повлече целото семејство. И плаќаа придонеси, и даваа убава плата, жената навистина имаше среќа. Но, има и такви кои душата ќе ти ја извадат за што е можно помалку пари, ќе те сместат во мала собичка и цел ден ќе те малтретираат за пари незамисливи за германски стандард“ вели нашата соговорничка.

Македонките поради неможност овде да најдат работа ја бираат и оваа опција за да заработат. Оние кои ќе отидат во странство за да чуваат дете, имаат и домашни обврски кои мора да ги завршат. Некои од нив имаат убави искуства, но некои наишле на големи проблеми во семејствата.

Некои од нив аплицирале за чување на едно дете, а кога стигнале ги пречекале две или три деца. Некаде добиле дополнителни задачи за кои не биле договорени...

Сепак не секое искуство е лошо и не секому му пречи ниската плата. Една Македонка која работела во Германија вели дека работата и била убава и дека работела кај Холанѓани кои работеле во Германија.

„Во Дизелдорф беа дојдени заради работа, После 9 години жената се враќа на работа и им требаше помош околу децата. Јас им бев прва негувателка,три дечиња имаа, девојче 9 години  и две машки едно од 6 и едно од 1 година. Во тие  3 месеци имав преубаво искуство, бев прифатена од семејството како нивно четврто дете. Заработката не беше многу голема,250 евра месечно плус платено вечерно чување на деца и викенди кога имаа потреба. Од страна на семејството ми беше обезбедено сè,кај нив бев сместена,  имав своја соба,бања,  месечен билет и во школо одев на курс по германски јазик“ – вели А.Т.

Друга девојка од Скопје која била на работа во Италија пак, вели дека никогаш повеќе не би заминала да го работи тоа.

„Работев од 7 до 23 часот секој ден, без прекин. Покрај чувањето деца работа ми беше и се останато за 600 евра месечно. Значи  не е само грижата за трите деца, туку и чистење, перење, пеглање, готвење... Беше макотрпно и тешко. Тоа беше еднакво на ропство. Никогаш повеќе не би заминала да работам такво нешто. Бев во Италија кај наши луѓе за да бидам третирана како робинка, не стасав ниту еден ден да прошетам а бев во една од најубавите земји“, раскажува Е.Ј.

Р.Ф.