ПЛАТЕНИ СЕ 716 ИЛЈАДИ ЕВРА ЗА 1,17 ОТСТО ОД АКЦИИТЕ НА УНИ БАНКА - кој е купувачот во двата блока

Добивај вести на Viber

Голема количина акции на една од најреномираните банки во земјава, УНИ Банка, беше продадена во текот на вчерашниот ден преку Македонската берза за долгорочни хартии од вредност.

Имено, поминаа два блока акции од по 3.000 и 3.800 акции на оваа банка, и двата блока по цена од 6.900 денари за акција.

А, доколку е еден купувачот на овие два блока, според пресметките тој за нив платил близу 716 илјади евра, додека, пак, ако се двајца различни купувачи на акциите, за првиот блок од 3.000 акции се платени околу 337 илјади евра, а за блокот од 3.800 акции е платена сума од 379 илјади евра, што значи дека под претпоставка толку би платил вториот купувач. 

Инаку, вкупната истргувана количина во двата блока од 6.800 акции на УНИ Банка, претставува 1,17 проценти од вкупниот број издадени акции на банката. Значи, станува збор за мал процент, но ваков блок кој од поодамна не се случил со акциите на УНИ Банка, може и да укажува на некакво раздвижување околу сопственичката структура на таа банка, а каде што сега има двајца неприкосновени сопственици, според големината на акционерските пакети кои ги поседуваат. 

Она што уште треба да се каже за оваа зделка е дека цената од 6.900 денари што се постигнала за акција во двата блока, е пониска од онаа по која се продавале акциите на УНИ Банка во последниве денови, па на пример на 16 јануари таа изнесувала 7.050 денари за акција.

Треба да се напомене и дека во последниот период се тргувале помали количини акции, а најголемата количина на редовниот пазар е истргувана на 5 декември, и тоа 40 акции.

Во мометов, УНИ банка има двајца големи сопственици, а тие се бугарските државјани Ѕеко Тодоров Минев и Ивајло Димитров Мутавчиев, кои поседуваат буквално идентични акционерски пакети од по 36,45 отсто од акциите, што е вкупно 72,9 отсто од акционерскиот капитал на банката. 

Н.Н.Ф.