По пост од 4 години НЛБ Тутунска банка ќе подели нето дивиденда од 496 денари за акција

Добивај вести на Viber

Официјалната најава за дивиденда ја зголеми пазарната цена на таа акција за 10 отсто за само еден ден. На последната берзанска цена од 6.056 денари дивидендата е принос од 8,2 отсто, што е највисок принос досега во споредба со сите акции што делат дивиденда за 2014 година. Последен пат дивиденда акционерите добиле за 2009 година и била 430 денари. Една од трите најголеми деловни банки НЛБ Тутунска банка ќе подели нето дивиденда од 496 денари за акција, што е прв пат по четири годишен пост акционерите да добијат принос на своите вложувања во акции во таа голема македонска банка. Оваа официјална вест веднаш ја крена цената на акцијата на 6.056 денари и тоа е највисока пазарна цена во изминативе 12 месеци тргување иако е постигната само со една истргувана акција. И со таа цена акцијата на НЛБ Тутунска банка носи принос од 8,2 отсто, а тоа досега е највисок дивиденден принос во однос на пазарната цена во споредба со сите други акции за кои беше објавено дека носат дивиденда. Акцијата на НЛБ Тутунска банка во изминативе 12 месеци се покажа како сосема солидна инвестиција за инвеститорите. Според официјалните податоци на берзата таа акција во овој период порасна за 3.556 денари од најниската годишна цена која изнесувала 2.500 денари за акција па до последната цена од 6.056 денари за акција. Ако се анализираат податоците за истргуваните количества акции на НЛБ Тутунска банка може да се заклучи дека не смее да се отфрли шпекулацијата дека некои инсајдери знаеле дека ќе следува солидна дивиденда. Податоците покажуваат дека од 23 март до 7 април се истргувани 1.701 акција на НЛБ Тутунска банка во ценовна маргина од 5.350 до 5.450 денари за акција. Тие 1.701 акција чинат 7 отсто од целото истргувано количество акции за период од една година,а и многу повеќе доколку се изземат 6.109 акции кои беа истргувани  на 29 октомври 2014 година што има третман на договорена трансакција заради големината на количината. Ова значи дека во последниве тринаесет трговски дена значаен е прометот со акциите на таа банка, и тоа непосредно пред објавувањето на предлог одлуката за дивиденда. Секако тоа дали информацијата е инсајдерска или не треба да испита Комисијата за хартии од вредност, единствен надлежен државен орган за контрола и мониторинг на македонскиот пазар на капитал. Предлог одлуката за поделба на дивиденда беше обајвена на 7 април веднаш по затворањето на тргување на Македонската берза за хартии од вредност. НЛБ Тутунска банка во својот неревидиран и неконсолидиран извештај објави дека има добивка за 2014 година во износ од 672,64 милиони денари поголема за речиси 50 милиони денари од 2013 година. Лани банката ги зголемила нето приходите од камати за 194 милиони денари на 2 милијарди денари. За 45 милиони денари во однос на 2013 година успеала да ги зголеми и нето приходите од провизии и надоместоци до ниво од 920,5 милиони денари. Кредитните пласмани на коминтенти со исклучок на банките се зголемени за 3 милијарди денари во однос на 2013 година до износ од 38,4 милијарди денари, а депозитите на коминтентите пораснале за фантастички 5 милијарди денари до ниво од 52 милијарди денари.