ПОЧИНА 11 ГОДИШНО МОМЧЕ НА КАРИЛ, по едномесечна борба, младиот живот згасна откако врз него падна пречка од гол

Добивај вести на Viber

Единаесет годишно момче од Скопје вчера нешто по 23 часот почина на КАРИЛ (Универзитетска Клиника за Анестезија, Реанимација и Интензивно лекување). Детето беше тешко повредено на 14 август годинава откако на фудбалски терен во Кавадарци врз него падна пречка од гол. Лекарите речиси цел месец се бореа за животот на детето, но за жал момчето починало, јавува „МКД.мк“.

По наредба на јавен обвинител телото е предадено на обдукција, а се води постапка и за причините поради кои се случи оваа трагедија.

Во Полициската станица во Кавадарци кога во август се случи настанот било пријавено дека на фудбалскиот терен во рамки на детското одморалиште Михајлово - Кавадарци, каде престојувале ученици од основно училиште од Скопје, еден малолетник бил повреден откако пречката од голот се превртела и паднала.

Од МВР тогаш информираа дека малолетникот се здобил со тешки телесни повреди, констатирани во Комплекс клиники „Мајка Тереза" Скопје, а на местото на несреќата беше извршен увид од страна на увидна екипа од Кавадарци.

Постапката за оваа трагедија продолжува и по смртта на детето.