Пораст на јавниот долг, сега изнесува 30,7 % од БДП

Добивај вести на Viber

Нов пораст на јавниот долг. Во ноември, долгот на централната влада достигна 30,7% од бруто домашниот производ - покажуваат најновите податоци на Министерството за финансии. Од вкупниот долг на централната влада, кој изнесува 2,4 милијарди евра, 1,6 милијарди евра отпаѓаат на надворешниот долг, на чија страна се забележува намалување во однос на октомври. Внатрешниот долг се зголеми и достигна 803,5 милиони евра, што во однос на месецот претходно претставува зголемување за 20 милиони евра. Иако 2012 та почна со ниво на јавен долг од 26,1% од бдп, во третиот кавртал почнува тренд на позначајно задолжување, особено на домшен терен, со што стапката се доближува до 31 % од бдп, што е највиската измерена стапка во последните пет години. Токму на крајот од 2012 та во јавноста се отвори жестока дебата за тоа колку навистина е задолжена државата дома и во странство и дали владата дозирано ја информира јавноста за состојбата со долговите. Поранешниот гувернер и еден од поранешните министри за финасии, Петар Гошев, како и академик Абдулменаф Беџети тврдеа дека податоците за вкупниот јавен долг, кои не се достапни на јавноста, покажуваат дека тој изнесува повеќе од 45 отсто од БДП. Во извештаите на меѓународните финансиски институции македонија е во групата на “средно “ задолжени земји. Неодамна од Светска Банка порачаа внимателно да се трошат буџетските пари. „Наш предлог за тоа како да се трошат скапоцените фискални ресурси во овој период на криза е тие да се инвестираат во капитални расходи кои се продуктивни во иднина, како што се инфраструктура и енергетика, бидејќи тие на среден рок го поддржуваат економскиот раст во една земја. Исто така, со оглед на фактот што одредени категории граѓани се поранливи, ја поддржуваме Владата во насока на зголемување на мрежата на социјална заштита“, изјави Бригит Хансел, тим лидер од Светската Банка. Оваа година почнува со ново задолжување од 250 милиони евра зад кое како гарант стои Светска банка. Законот за задолжување владачкото мнозинство го изгласа без присуство на опозицијата во парламентот, откако претходно на ист начин го усвои и буџетот за 2013 та година. „Клучните четири активности што се поддржуваат со овој заем се во следните области: производство со повисока додадена вредност, олеснување на преструктуирањето на земјоделскиот сектор, подобрување на ефикасноста на услугите за трговска логистика и поголема флексибилност на пазарот на труд“, изјави Министерот за финансии Зоран Ставревски. За 6 дена Владата треба да врати 185 милиони евра по основ на евробврзницата што беше земена во кризната 2009 та година со значајно висока камата од 9,8%. Редакција Фактор