Потресно сведоштво на случаен минувач: Саздовски плукаше крв по смртоносното тепање

Добивај вести на Viber

Миле Алексовски, кој сведочеше за убиството на навивачот Никола Саздовски како случаен минувач на настанот, на судското рочиште изјави дека 20-годишникот плукал крв додека залудно го освестувале откако бил претепан и добил удар со нога во вратот откако паднал како покосен на земја.

Тој ги препозна обвинетите за убиство со умисла Бесир Беља и Скендер Демири, кој го претепале Саздовски на автобуската постојка пред фабриката „Алкалоид“ на булевар „Александар Македонски“ во Автокоманда.

– До мене беше покојниот Никола и девојката, дојдоа тројца дечки мислев дека се знаат, му побараа лична карта и почнаа да го удираат. Викав остајте го детето ќе викнам полиција. Тоа траеше околу минута, минута и пол. Детето падна од удирањето и удри на главата. Двајца дечки побегнаа накај колата „мерцедес“, а едниот го удри со нога на вратот. Ја запалија колата и отидоа, истакна сведокот Миле Алексовски на рочиштето за убиството на Никола Саздовски.

Двајцата од напаѓачите, Бесир Беља и Скендер Демири, се во притвор во затворот „Скопје“ во Шутка, а за третоосомничениот, кој се уште е недостапен за органите на прогонот распишана е домашна и меѓународна потерница.