ПОТРОШУВАЧКИТЕ И СТАНБЕНИТЕ КРЕДИТИ И ПОНАТАМУ ОМИЛЕНИ – граѓаните и компаниите должат над 7,5 милијарди евра во банките

Добивај вести на Viber

Граѓаните и компаниите на банките во земјава им должат над 7,5 милијарди евра. Односно, над 7,5 милијарди евра достигнува кредитното задолжување во домашните банки во земајва.

Најновите податоци на Народната банка откриваат дека на годишна основа кредитите се зголемиле за 7,3 отсто.

Односно на крајот на 2023 година задолжувањето изнесувало на 7,3 милијарди евра, и се зголемило на 7,5 милијарди.

Притоа бројките откриваат дека компаниите се задолжени со 3,6 милијарди евра, додека пак домаќинствата имаат подигнато кредити во висина од 3,9 милијарди евра.

-  Месечната и годишната промена е резултат на зголеменото кредитирање на двата сектора, при поизразен придонес кон растот на кредитите на секторот „домаќинства“ – соопштуваат од Народна банка.

Од централната банка откриваат дека кредитите на корпоративниот сектор имаат месечен раст од 0,5 проценти, додека на годишно ниво од 7,3 отсто. Промената кај двете основи во целост се должи на зголеменото кредитирање во денари, додека кредитите во странска валута забележаа пад.

Што се однесува пак до кредитите кои ги подигнале домаќинствата исто така има раст, и тоа на месечно ниво од 0,8 проценти, а на годишно од 7,5 отсто.

Од НБ истакнуваат дека има поизразено кредитирање во денари.

Од централната банка посочуваат дека и во јули годинава, како и претходните месеци, се забележува дека има поизразен интерес за конкретни кредити, поточно за потрошувачките и станбените кредити.

- Во јули 2024 година, гледано според намената на кредитите одобрени на физичките лица, кај потрошувачките и станбените кредити, како најзастапени категории, е забележан месечен раст од 0,9 отсто и 0,8 проценти – соопштуваат од НБРСМ.

Притоа годишното задолжување е зголемено за 6,3 проценти кај потрошувачките и 10,5 отсто кај станбените кредити.

Автомобилските кредити овој месец се повисоки за 2,5 отсто, додека на годишно ниво за 23,6 проценти. Кредитите одобрени на кредитни картички се намалени за 0,2 отсто и 8 проценти, на месечна и годишно ниво.

Во јули, негативните салда на тековните сметки забележаа месечен пад од 1 процент во услови на годишен раст од 8,4 отсто. Во јули, кредитите одобрени врз други основи се непроменети на месечна основа, додека во споредба со истиот период претходната година, тие се намалени за 18,4 проценти.

П.О.

Фото: Фактор