Добивај вести на Viber
Дополнетиот предлог за изменување и дополнување на Буџетот за 2014 година денеска ќе се најде пред пратениците во македонското Собрание.
Со ребалансот Владата ги намалува приходите и расходите за 2% од првично планираните, пришто како што изјави министерот за финансии Зоран Ставрески, се крати подеднакво од сите министерства.
„Се работи за мини – ребаланс кој што ќе овозможи… навремена исплата кон буџетските корисници, навремена исплата на платите и пензиите, на социјалните надоместоци, на субвенциите кон земјоделците, како и реализација на предвидените капитални инвестиции“, рече Ставрески кога го презентираше прекројувањето на државната каса.
Со предложениот ребаланс предвидено е дефицитот да се зголеми и да изнесува 3,9 проценти од БДП, а се ревидира и стапката на раст на македонската економија - од 3,2 проценти сега се предвидува да изнесува меѓу 3,5 и 3,7 проценти.
Пратениците денеска ќе расправаат за интензивирање на изградбата на Коридорот 10, реалокација на средства меѓу буџетските корисници, обезбедување дополнителен износ во Фондот на ПИОМ и за надминување на последиците од елементарните непогоди. На расправата нема да присуствуваат пратениците од опозицијата, кои ја бојкотираат работата на Собранието.
Расправата за ребалансот пред матичната собраниска комисија предизвика тепачка меѓу пратениците на ДУИ и ДПА, кои недоразбирањата за трошењата од државната каса се обидоа да ги решат со физичка пресметка.