Прв работен ден за Бишев во Шпаркасе Банка, Грците бараат директор за Стопанска!

Добивај вести на Viber

Глигор Бишев и официјално по први Мај почна да ја извршува својата функција како прв човек на Шпаркасе Банка, откако неговиот трансфер изминатиов месец беше најинтересното банкарско случување во Македонија. Бишев, официјално не сакаше да ги коментира причините поради кои ја напушта Стопанска Банка. Заминувањето беше  објавено писмено, преку соопштение зад кое како потписник е Стопанска Банка.

“Господинот Бишев, кој беше Генерален Извршен директор на банката дванаесет и пол години, донесе одлука да ја продолжи својата кариера вон Банката, напишаа од Стопанска.

Инаку Шпаркасе е дел од австриска групација која во моментов котира како петта по големина во земјава. Според доброупатени извори, понудата на Шпаркасе-банка до Бишев била испорачана пред подолг период. До доаѓањето на Бишев  со Шпаркасе Банка раководеше Александра Радиќ, преседател на Управниот Одбор на банката, која беше делегирана од  Белград.

Со трансферот на Бишев во Шпаркасе оваа банка најави засилен пробив на македонскиот банкарски пазар, па доброупатени извори не ја исклучија можноста во иднина да се случат и банкарски прегрупирања, купување или спојување на одредени банки во кои своја улога секако би имала и Шпаркасе. КОЈ ЌЕ ГО НАСЛЕДИ БИШЕВ? Од друга страна Бишев, иако ја остави Стопанска банка во добра финансиска кондиција, Грците многу скоро ќе мора да назначат нов директор.

“Во 2012 Стопанска банка оствари пораст на кредитирањето од 5% и оствари нето добивка од 12,9 милиони евра, што е резултат на ефикасното искористување  на домашното и девизното штедење. Лошите пласмани беа под целосна контрола и целосно резервирани и беа за 1,5% пониски од просекот на македонскиот банкарски сектор.“ соопштија од банката.

Бишев седна во директорската фотеља во Стопанска Банка само 6 месеци откако заврши операцијата за приватизацијата, односно продажбата на Стопанска Банка на грчката НБГ Групација. Во 2000 та година, Бишев ја напушти позицијата заменик-гувернер во Народната Банка и го презеде кормилото на Стопанска Банка.

Токму во април ќе се одбележат 13 години откако Стопанска Банка доби грчки газди.

Со заминувањето на Глигор Бишев, по повеќе од 12 години директорување, Стопанска Банка ќе добие нов менаџер. Според информации од банкарските кругови, новиот директор ќе биде номиниран директно од страна на “ Национална Банка на Грција“. НБГ како целосен сопственик на Стопанска Банка можно е да именува странско лица  за наследник за Бишев. Грчките газди веќе го подготвиле теренот, иако официјално не се соопштува новото директорско име.