Ребаланс на буџет: Ситна корекција или нови долгови?

Добивај вести на Viber

Ребалансот на буџетот денеска во Собрание ги скара власта и опозицијата, за првите се прави мала корекција, вторите пак сметаат дека се прават нови долгови. Жестока расправа во Комисијата за финансирање и буџет се водеше меѓу министерот за финансии Зоран Ставрески и пратеникот на СДСМ Марјанчо Николов. Од СДСМ порачаа дека ребалансот е задоцнет, води до нови долгови и се краде иднината на земјата заради, како што истакна Николов, сегашноста исполнета со ветување и реклами кои неносат ништо добро на граѓаните. „Со овој ребаланс вие фактички признавате дека сте влада која живее од денес за утре и влада која не може да дише без кредити, кои ви се како терапија на некој тешко болен и мора постојано да прима кредити како инфузија за да може да преживеете“, посочи Николов кој додаде дека за три години, вклучувајќи ја и 2014-та, владата ќе потроши 900 милиони евра повеќе, отколку што ќе заработи од македонската економија. За министерот Ставрески, станува збор за мал ребаланс кој ја опфаќа само расходната страна. „Се предвидуваат реалокација на средства во делот на платите по основ на корекции, но не се менува предвидниот износ, потоа се предвидуваат дополнителни средства во Фондот за ПИОМ и во Министерството за образование и наука“, рече Ставрески кој истакна дека од почетокот на годината до крајот на септември реализирани се приходи во буџетот од 103.018 милиони денари, а на расходната страна 118.861 милиони денари. Тој повтори дека  редовно се даваат плати, пензии и социјалните надоместоци, а растат капитални инвестиции и зголемени субвенциите. Дефицитот е 3,2 проценти од БДП или 15.843 милиони денари, појасни министерот според кого со ребалансот ќе се обезбедат повеќе средства за пензии и за лабаратории во виско образовните институции. Со ребалансот дел од министерствата остануваат со исти буџети, а кај дел се извршува намалување.За ребалансот има 52 амандмани, а комисиската расправа ќе трае 10 дена. Расправата  за ребалансот на Буџетот утре продолжува.