Рајнер отвора нова база во Тирана: Инвестиција вредна 300 милиони долари

Добивај вести на Viber

Рајнер, најголемата европска авиокомпанија и најбрзо растечкиот превозник во Албанија, ќе ја отвори својата прва база на аеродромот во Тирана во април 2026 година. Таа ќе смести три авиони Боинг 737-800, што претставува инвестиција вредна 300 милиони долари.

Компанијата вели дека проектот ќе поддржи повеќе од 3.000 работни места, вклучувајќи околу 100 нови, добро платени позиции за пилоти и кабински персонал.

Во летната сезона 2026 година, Рајнер ќе оперира повеќе од 450 неделни летови од Тирана до вкупно 33 дестинации во 13 земји, пишува Телеграф Аеро. Тие вклучуваат десет нови линии до Бирмингем, Даблин, Милано (Малпенза), Малта, Неапол, Пескара, Познањ, Трст, Торино и Верона. Компанијата, исто така, ќе го зголеми бројот на летови на девет постоечки линии, вклучувајќи ги Бари, Лондон, Прага, Стокхолм и Варшава.

Со отворањето на базата, Рајнер планира да го зголеми својот капацитет на базата на аеродромот во Тирана на околу четири милиони патници годишно. Во текот на следните пет години, компанијата има намера да го зголеми бројот на авиони на база на шест, да отвори повеќе од 20 нови рути и да превезува над пет милиони патници годишно до 2030 година, под услов да се одржуваат ниски такси и поволни услови за пристап.

Извршниот директор на компанијата, Мајкл О’Лири, нагласи дека од влегувањето на албанскиот пазар во ноември 2023 година, компанијата бележи силен раст и дека новата база е логичен чекор кон понатамошно проширување.

„Оваа инвестиција не само што ќе донесе нови дестинации, туку ќе создаде и илјадници работни места и ќе придонесе за развој на туризмот во Албанија“, рече О’Лири.

Главниот директор на аеродромот во Тирана, Пјервиторио Фараби, нагласи дека одлуката на авиокомпанијата е резултат на значителни инвестиции во инфраструктура, вклучувајќи го проширувањето на пистата, реконструкцијата на маневрирачките области и тројно зголемување на капацитетот на терминалот.

„Подготвени сме да обезбедиме брз и сигурен процес на обработка на патници и со нетрпение очекуваме Тирана да стане нова база во мрежата на Рајанер“, додаде Фараби.

Ова ќе биде првата постојана оперативна база во Албанија, означувајќи нова ера во развојот на воздушниот транспорт на земјата и нејзината поврзаност со остатокот од Европа.