РАМА ОДИ НА СРЕДБА СО АЛБАНЦИТЕ ВО ГРЦИЈА: Ултранационалистите ќе го пречекаат со протести

Добивај вести на Viber

Албанскиот премиер Еди Рама утре ќе оди во Солун на средба со албанската дијаспора, а грчките ултранационалисти ќе го пречекаат со протест.

„Со особено задоволство ќе се вратам кај Албанците во Грција, овој пат во Солун, каде историјата не поврза со илјада нишки и денес не обединува повеќе од кога било, со нашите јужни соседи, како два европски народа, кои дури и за неколку години ќе бидат рамо до рамо во Европската Унија“, напиша Рама на Фејсбук.

Средбата, која се одржува под познатото мото „Горд за Албанија“ е закажана за во 11 часот во хотелот „Порто Палас“.

Првата средба тој ја одржа во Атина на 12 мај, по што на 26 истиот месец во Милано. Во Њујорк, беше на 26 минатиот месец а на 24 овој месец ќе биде во Лондон, средба која беше првично планирана за месец мај.

На средбите тој ја бара поддршката на дијаспората за четврт мандат, на која право да гласа и се дава за првпат на парламентарните избори што во Албанија ќе се одржат на пролет.

Како што објави Топ чанел грчките ултранационалисти планираат да го пречекаат со протест, на кој главниот говор ќе го одржи претседателот на грчката ултранационалистичка партија, Национален фронт, Димитрис Валасидис. 

Се дознава дека за време на протестот на улица ќе бидат фрлени летоци на кои ќе пишува „Слобода за Ворио Епир“ (Слобода за Северен Епир) -   јужниот дел на Албанија, гаде главно е концентрирано грчкото малцинство.

Албанија ги почна преговори со ЕУ, а Рама планира до 2030 година, земјата да ја внесе во европското семејство.