Расте нето приходот од камати и надоместоци на „Уни банка“

Добивај вести на Viber

Менаџментот успеал да ги зголеми нето приходите од камати за 46,8 милиони денари и нето приходот од надоместоци и провизии за 23 милиони денари „Уни банка“ во првите девет месеци годинава успеа да го зголеми нето приходот од камати како и нето приходите од надоместоци и од провизии, покажува неревидираниот деветмесечен биланс на успех на таа банка. Во првите девет месеци менаџментот на банката успеал да ги зголеми нето приходите од камати во споредба со лани за 46,8 милиони денари односно за 14,7 отсто во однос на лани кога нето приходите изнесувале 317,6 милиони денари, а годинава се 364,4 милиони денари. Растот на нето приходите од камати се случи во услови кога вкупните приходи од камати на таа банка за периодот јануари – септември годинава изнесуваат 501,9 милиони денари и се пониски од лански 32,3 милиони денари односно за 6 отсто. Кај втората по големина приходна ставка – надоместоците и провизиите банката бележи раст по две основи и кај бруто приходите и кај нето приходите. Бруто приходите се 190,3 милиони денари и се за 23 милиони денари повисоки од истите во првите девет месеци лани. Кај нето приходите од надоместоци износот годинава е 103,6 милиони денари,  а лани бил 98,9 милиони денари. Кај расходните ставки за вработени, амортизација и останати трошоци забележливо е дека менаџментот успеал да ги намали трошоците во однос на истиот период лани. Кај втората најголема расходна ставка – трошоците за вработени во првите девет месеци годинава се платени 156,6 милиони денари, 6 милиони денари помалку од истиот период лани. Кај најголемата расходна ставка „останати расходи од дејноста“ кастрењето на трошоците изнесува 24,3 милиони денари и нивниот износ годинава е 173,8 милиони денари. Резервациите за пласманите на банката годинава изнесуваат 23,5 милиони денари, а загубата заради оштетување на нефинансиски средства изнесува 47,3 милиони денари. Токму заради резервациите за пласмани и заради загубите за оштетување на нефинансиски средства банката има пониска добивка од ланската за 3,8 милиони денари. Именот годинава добивката за првите девет месеци годинава е 51,8 милиони денари, а лани била 55,6 милиони денари. Добивката по акција изнесува 124 денари, а лани изнесувала  140 денари. Последната пазарна цена на таа акција е 767 денари, а е постигната во петокот на 21 ноември. Р.Ф.