Разрешениот Костадин Богданов: ВМРО-ДПМНЕ е далеку од демократска и европска партија
Објавено во: Македонија 23 Октомври, 2018
ВМРО-ДПМНЕ е далеку, многу далеку од идеалот за модерна, демократска и европска партија. На овој начин Костадин Богданов, кој на вчерашниот состанок на Централниот комитет на ВМРО-ДПМНЕ беше разрешен од партиската функција, ја искоментира одлуката на неговиот профил на „Фејсбук“.
Тој оцени дека ВМРО-ДПМНЕ преку синоќешната театрална катарза се реформира во нова антизападна партија.
„Моето политичко дејствување во раководоството на ВМРО ДПМНЕ беше со единствена цел: да изградиме модерна, демократска и европска партија која силно, со конкретни чекори ќе ја поддржи евроатлантската агенда на нашата држава. За жал, раководството на ВМРО ДПМНЕ е далеку, многу далеку од овој идеал. Напротив, раководството на партијата продолжи да биде промотор на антизападна националистичка реторика, која ги топли срцата на краток рок, но на среден и долг рок создава несогледливи последици врз општеството, граѓаните и иднината на државата. Искрено верувам дека еден ден во ВМРО ДПМНЕ ќе дојде раководство кое ќе ја сфати пораката од предците, и суштината на нивната револуционерна борба која ја празнуваме денес“, напиша Богданов.