Развој или „билдање“ рејтинг: Скроен е новиот буџет

Добивај вести на Viber

Владата го скрои буџетот за следната година, но и ребалансот за тековната. Oд 3,5 на 3,9 отсто се продлабочува буџетскиот дефицит со последниот ребаланс на буџетот кој, според министерот за финансии Зоран Ставревски е потребен бидејќи се пренаменети средства за пензии и за образование , односно 16 милиони евра се префрлени за исплата на пензиите, а за образованието дополнителни 6 милиони евра. „ Средствата во овие ставки не се пренаменети, туку проширен е дефицитот на 3,9 проценти, а финансирањето е од Буџетот. Нема да има кратење на реализацијата на капиталните инвестиции која оди добро и во првите осум месеци е 10 проценти повеќе од минатата година и се очекува до крајот на годината да се оствари предвидената реализација“, рече Ставрески. Новиот буџет ќе биде за 7% повисок од лани, со расходите од 2.86 милијарди евра, а приходи од 2.56 милијарди евра . Буџетот е базиран врз проекции за раст на економијата од 3.2 отсто и инфлација од 3.3%. „ Вкупниот износ на капитални инвестиции е 22,5 милијарди денари и е за 20 проценти повеќе од оваа година. Ако за 20 проценти се зголемат капиталните инвестиции сметам дека тоа е најдобар одговор дали е променета структурата и дали оди во насока на развој. Нема да најдете држава во Европа што во една година ги зголемува капиталните инвестиции за 20 проценти, изјави вицепремиерот и додаде дека е значајно што Владата и во вакви околности на криза во Европа одвојува за 20 проценти повеќе средства за капитални инвестиции кои, пак, ќе овозможат раст на економијата“, појасни Ставрески. Освен буџетот и ребалансот, до Собранието е доставена и завршната сметка за 2012 година, која во Собранието доцни веќе два и пол месеци. Ставрески потенцира дека поголемиот дефицит за ланската година од планираниот бил резултат на намалените приходи во буџетот, а не на раст на трошоците како што тврдеше опозицијата. Во очекување на анализи на повеќе експерти, во интервју за 24 вести, потпретседател на СДСМ Ванчо Узунов забележа дека Владата скрои изборен буџет за купување на рејтинг. „Проекциите за догодина се нереални – приходите неостварливи, се да биде во функција на изборите, на рејтингот на Владата. Да биде сакан премиерот и другите“, вели Узунов.