РОКОТ ТЕЧЕ: 40 илјади даночни пријави веќе поднесени до УЈП

Добивај вести на Viber

Заклучно со вчерашниот ден, до Управата за јавни приходи биле поднесени вкупно 40.000 годишни даночни пријави, информираше директорот на Управата Горан Трајковски.

„Гледано во споредба со минатите години, сè поголем број граѓани ја исполнуваат обврската пред законскиот рок – 15 март, меѓутоа сè уште останува една категорија граѓани кои ќе го чекаат крајниот рок кога шалтерите во контакт центарот опслужуваат од седум до девет илјади граѓани“, истакна Трајковски.

Од јануари минатата година се користи и системот за е-даноци, така што може да се очекува дека оние граѓани кои се регистрирани на овој систем, ќе ги поднесат даночните пријави по електронски пат. УЈП денеска ја промовираше новата услуга „Е-промена на податоци“, со која секој граѓанин со јавување на бесплатната телефонска линиија 0800 33 000 ќе може да изврши промена на адресните податоци, телефонскиот број или електронската пошта, кои се водат во Регистарот на даночни обврзници на УЈП. Според Трајковски, со користење на оваа услуга се овозожува заштеда на време и трошоци за пријавување и ажурирање на адресните податоци за даночни цели во УЈП, а во Македонија било пресликано холандското решение.

„Сите граѓани на овој бесплатен телефонски број кажувајќи го своето име и презиме, матичниот број и бројот на даночното решение за кое се задолжени, можат да добијат од УЈП пин код, кој понатаму ќе го користат во комуникација со управата“, појасни Трајковски.

За сега пин-кодот може да се користи само за промена на адресните податоци, додека во следанта фаза, од средината на оваа година, пин-кодот ќе може да се користи и за проверка на состојбата во УЈП,  за пополнување на електронски решенија, како и за вршење на увид во даночната картичка. Досега оваа услуга ја користеа само правните субјекти.