САД СО УШТЕ ЕДЕН НЕУСПЕШЕН ОБИД ДА ЈА ОСВОЈАТ МЕСЕЧИНАТА, ЈАПОНИЈА ЌЕ ПРОБА УТРЕ: SLIM ќе ја проучува површината јужно од Морето на тишината
Објавено во: Свет 18 Јануари, 2024
Јапонија утре
околу 16 часот ќе се обиде да изврши тежок вселенски маневар и да слета на
површината на Месечината за прв пат. Досега во тоа успеале само четири
земји: САД, Кина, поранешниот Советски Сојуз и Индија. Тоа е многу ризичен
потфат. Во август минатата година, Индија стана четвртата земја која досега
успеа да изврши меко или контролирано слетување на Месечината, откако Русија не
успеа да го стори тоа истиот месец.
Зошто е потешко да се спушти на Месечината денес отколку пред 50 години?
Минатата недела вселенското летало Peregrine (соработка помеѓу приватна американска компанија и НАСА) се откажа од оваа идеја. Ако успееше, тоа ќе беше првата американска мисија што слета на Месечината од 1972 година, односно од ерата на програмата Аполо. Лани на Месечината се урна и лунарниот лендер Хакуто-Р на јапонската компанија Испејс.
Значи, доколку јапонскиот лендер SLIM успешно слета на површината на нашиот природен сателит, тоа ќе биде третата земја која постигнала таков успех во 21 век и петта што ќе спроведе таканаречено меко слетување на Месечината во историјата на човештвото.
Тешко и меко слетување на Месечината
Кога кинеското вселенско летало Chang'e 3 слета на Месечината во 2013 година, тоа беше првото меко слетување на нашиот природен сателит по советскиот Луна 24 во 1976 година. Мекото слетување на Месечината значи контролирано спуштање на вселенско летало на површината без значително оштетување на леталото и/или неговите научни инструменти.
Тешкото слетување се однесува на спуштање на тлото што резултира со значителна штета на леталото, а често и до губење на контакт. Овој тип на слетување може да биде намерно или планирано, но може да биде и неуспешен обид за меко слетување.
„Не чекаат 20 минути хорор“
„Мислам дека имаме 20 минути ужас и во периодот од забавување до слетување на површината на Месечината, ќе заборавиме да дишеме“, рече Кенџи Кушики од проектот SLIM, пренесува ССN.
Малиот истражувачки лендер е дизајниран да демонстрира високопрецизно слетување на сонди кои се евтини и лесни. Јапонската вселенска агенција (JAXA) се надева дека оваа нова технологија ќе овозможи слетување на опасен, карпест терен.
Што ќе истражуваат на Месечината?
SLIM ќе се обиде да слета во област која се протега само до 100 метри. За споредба, зоната за слетување на Перегрин се протегала неколку километри. Доколку SLIM ја пропушти својата шанса да ја „допре“ Месечината утре, ќе се обиде повторно на 16 февруари.
Во случај на успешно слетување, SLIM ќе ја проучува површината јужно од Морето на тишината за краток период. Неговата цел е локација во близина на мал ударен кратер во рамнината позната како Море на Нектар, за која се верува дека е формирана од античка вулканска активност. Таму ќе го истражат составот на карпите, што би можело да ни помогне подобро да го разбереме формирањето и развојот на Месечината.
ФОТО: Japan Aerospace Exploration Agency