СДСМ: Место фалби, Владата да се извини за прескапиот кредит!

Добивај вести на Viber

Денешната отплата на повеќе од 180 милиони евра за достасаната еврообврзница е кулминација на неодговорното однесување на оваа власт, обвинија денеска од опозициската СДСМ за задолжувањето од пред три години, кога Владата земе на заем 175 милиони евра со каматна стапка од речиси 10% на годишно ниво. Од опозицијата посочуваат дека парите не се искористиле за капитални инвестиции, бидејќи, како што пишуваат, нема автопат, ниту хидроцентрала, коишто за три години можат да донесат приход за да се врати и позајменото и да се плати каматата. Тоа значи дека сите граѓани на Република Македонија во изминатите три години се осиромашени за камата која изнесува над 50 милиони евра, посочуваат од СДСМ. „Наместо да се фали дека го вратила долгот (којшто патем е вратен со пари земени од ново задолжување), Владата на Премиерот Груевски треба да им се извини на граѓаните затоа што позајмила пари, парите не ги инвестирала во капитални инвестиции и целото луксузирање на власта на крајот падна на грбот на граѓаните. Лесно е да се земат милиони евра на заем со огромна каматна стапка, а парите да се потрошат за луксузирање, а на крај друг да го врати заемот“, стои во сопштението.