СДСМ обвинува - Талески вработувал од куќен притвор

Добивај вести на Viber

Од СДСМ Битола денеска обвинија дека  градоначалникот Владимир Талески  додека бил во куќен притвор, распишувал огласи за вработување во општинската администрација. 

Од партијата тврдат дека вработувањата се незаконски затоа што  не добиле согласност од Советот на Општина Битола. Советникот Благојче Котевски објасни дека се работи за вработувања на 19 државни службеници, а огласот за вработување во Општина Битола е од 26 август. 

„Општината треба да има годишен план за вработување кој треба да биде доставен и усвоен од Советот на Општина Битола до 31 март 2016 година. Таков план Советот нема изгласано. Секое работно место во овој оглас е поврзано со национална припадност. Имено, советникот за локални патишта и улици треба да биде Албанец, раководителот на одделот за администрација и општи работи – Македонец, а советникот за водење на постапка за јавни набавки – Ром. Ова е директно кршење на членот 9 од Уставот на РМ, кој гарантира еднаквост без разлика на национална, етничка, родова и на социјална припадност“ – кажа Котевски.

СДСМ најави дека ќе поднесе прекршочна пријава против Општина Битола како објавувач на овој оглас.

Од ВМРО-ДПМНЕ одговорија дека Советот ги одобрил вработувањата со тоа што го донел буџетот, во кој се предвидени средства за новите лица што ќе се вработат.

„Советот на Општина Битола веќе даде согласност преку донесување на буџетот, во чии рамки заеднички предвидовме средства за нови вработувања “– вели  Виолета Ковачевиќ од ВМРО-ДПМНЕ.

Таа рече дека планот за вработување го одобрило Министерството за информатичко општество и администрација.