СДСМ со реакција: ПОСЕТАТА НА МИЦКОСКИ НА УНГАРИЈА ОТВОРА СОМНЕЖИ ЗА ПОВЕЌЕ СУДСКИ ПРОЦЕСИ ПРОТИВ ГРУЕВСКИ

Добивај вести на Viber

Со честите посети на Будимпешта во клучни периоди се покажува дека единствена цел на Мицкоски е да го одбрани криминалот на Никола Груевски, сметаат од СДСМ.

„Очигледно е дека Христијан Мицкоски е по нови насоки и задачи кај неговиот шеф и ментор, Никола Груевски“, реагираат од СДСМ, откако лидерот на ВМРО-ДПМНЕ објави дека беше во Будимпешта, Унгарија, за да ја следи изборната ноќ од штабот на сестринската партија Фидес на старо-новиот унгарски премиер Виктор Орбан.

Според социјалдемократите, посетата на Будимпешта отвора сомнежи за судските процеси против Груевски, при што социјалдемократите го споменуваат предметот „Плацови на Водно“ кој е во својата завршница.

„Посетата на Мицкоски на Унгарија отвора сериозни сомнежи и во врска со повеќе судски случаи кои се водат во земјава против Никола Груевски и поранешното раководство на ВМРО-ДПМНЕ. Дали Груевски му ја кажа стратегијата на Мицкоски за одбраната во случајот ’Плацови на Водно‘? Во овој судски предмет, Груевски е обвинет за сторено кривично дело перење пари и противправно стекнување и прикривање имот. Со честите посети на Будимпешта во клучни периоди се покажува дека единствена цел на Мицкоски е да го одбрани криминалот на Никола Груевски“, реагираат од СДСМ.

Според социјалдемократите, ВМРО-ДПМНЕ сè уште е партија раководена од Никола Груевски, партија која е единствена на браникот на криминалот на режимот.