СДСМ: Владата го зголеми јавниот долг за 40 мл.евра – За да го врати, државата треба една година од воздух да живее

Добивај вести на Viber

За нови 40 милиони евра го зголемила владата јавниот долг на државата, соопштија вчера од СДСМ, повикувајќи се на податоци од Министерството за финансии. Според опозиционерите, јавниот долг се искачил на 2 милијарди и 736 милиони евра, односно 34,5% од БДП кој го прогнозира владата за оваа година. „Заклучно со октомври, владата го зголемила јавниот долг за 192 милиони евра за 10 месеци во 2013. За последниве пет години таа го дуплирала јавниот долг кој во 2008 изнесуваше една милијарда и 386 милиони евра. За илустрација, јавниот долг заклучно со октомври е за скоро 170 милиони евра повисок од вкупните приходите кои владата планира да ги собере со буџетот во 2014 година. Тоа значи дека владата не задолжила за повеќе од едногодишната вредност на платите, пензиите, социјалните трансфери, субвенциите, капитални инвестиции. За да се врати овој долг, една година државата треба да не троши ништо, да живее од воздух и повторно на крајот да останеме должни“ - се вели во соопштението на социјалдемократите. Оттаму се надеваат дека министерот за финансии „нема да излезе повторно со ноншалантна изјава како минатиот месец кога кажа дека зголемувањето на долгот од 9 милиони евра е смешно мала сума“.