Се бара консултант за железничката пруга Крива Паланка-Деве Баир

Добивај вести на Viber

Делегацијата на ЕУ го одобри предлог-проектот за изработка на основниот проект за делницата Крива Паланка-Деве Баир (граница со Република Бугарија) со средства од инструментот ИПА во висина од 3,5 милиони евра. Министерството за транспорт и врски веќе распиша јавен повик за избор на консултант кој ќе треба да го изработи основниот проект за рок од 22 месеци. Со изработката на основен проект за оваа делница ќе се заокружи целиот проект за железничкиот Коридор 8, односно железничката пруга кон Бугарија со комплетна проектна документација. Рокот за пријавување е до 20.11.2014 година. Првичните проценки се дека изградбата на оваа делница ќе чини 330 милиони евра но точната сума ќе се знае по изработката на основниот проект. Проектната документација ќе биде основа за понатамошни инвестиции во градежни активности. Во тек е изградбата на првата железничката делница од оваа пруга, на делот од Куманово до Бељаковце во должина од 31км. Според договорот со компанијата Вибе изградбата на оваа делница ќе чини 39 милиони евра а се планира да се заврсши во третиот квартал на 2016 година. За втората делница од Бељаковце до Крива Паланка потпишан е договорот за изработка на основниот проект по што до 2015 година треба да биде избрана и компанијата која ќе ги извршува градежните активности на овој потег. Компанијата Обермаер Хелас ЛТД која го доби тендерот за изработка на основниот проект има обврска во рок од 24 месеци да ја изготви целосната проектната документација. Според акциониот план, градежните работи на оваа делница ќе започнат во првиот квартал од 2016 година. Инвестицијата за изградба на оваа делница (Бељаковце - Крива Паланка) ќе чини 145 милиони евра за што преговорите со ЕБОР се финализирани и се очекува да се потпише Договор за заем меѓу Министерството за финансии и ЕБОР. Должината на оваа делница е 34 километри. За последниот трет дел на Коридор 8 - Исток од Крива Паланка до Деве Баир на бугарската граница, долг 23,4 километри, од страна на Европската Унија се алоцирани 3.5 милиони евра, средства кои претставуваат грант од ИПА компонентата за регионален развој во рамките на Оперативната програма за регионален развој, информира Министерството за транспорт и врски. „Во оваа насока, стратешка определба на Владата на Република Македонија е финализирање на оската исток-запад на нејзина територија, односно железничкиот дел од Коридорот 8, кој е заеднички приоритет за сите земји од регионот за поврзување транспортните текови од Јадранското и Јонското Море со оние од Црното Море“, велат од ресорното Министерство.