СЕ ПАЗАРИ ЛИ МИЦКОСКИ: Како се обидува лидерот да ги спаси напаѓачите од 27 април
Објавено во: Македонија 24 Октомври, 2018
Лидерот на најголемата опозициска партија ВМРО ДПМНЕ Христијан Мицкоски побара донесување на закон за амнестија за сите учесници во насилствата во парламентот од 27 април минатата година.
-Слушајте ме добро, ајде донесете закон за амнестија кој го предлагаме за сите учесници од 27 април за да би имале неселективна правда за сите , а не само за оние кои ви служат-рече Мицкоски, алудирајќи на обвинетите пратеници од опозицијата кои гласаа за одлуката за почеток на уставни измени поради спроведување на Договорот со Грција, што го предлага Владата.
Мицкоски во 40 минутниот говор на прославата на ВМРО , познат како Ден на ВМРО , рече дека осум пратеници на опозициската коалиција на ВМРО ДПМНЕ „За подобра Македонија“, кои во петок гласаа спротивно на партискиот став, ги „издале партијата и државата“, и дека се „воделе од личен интерес“.
-Колку и да се шират дезинформации, и колку некој да ми кажува дека сум одлепил од реалноста, вистина е дека имаше притисок на пратениците и дека тоа беа притисоци на власта. И дел од платениците влегоа со лични аранжмани со власта, надевајќи се на своја слобода, но разочарувајќи го народот. Дел од нив тоа и лично го признаа“ - рече Мицкоски.
Предлогот на Владата на Македонија за почеток на уставни промени поради спроведување на договорот со Грција и промената на името на државата во Северна Македонија е усвоен со неопходно 2/3 мнозинство од 80 гласа благодарение на гласовите на осумте пратеници од коалицијата собрана околу ВМРО ДПМНЕ.
И.С.