Се продаваат како алва – повели да си купиш грчки остров

Добивај вести на Viber

Да си купи грчки остров „натопен“ со сонце и опкружен со тиркизно море е сон на секој супербогаташ. Традиционално, овие острови ретко се продаваат, туку остануваат во истите семејства со генерации. Но, сега работите се сменија! Моментално на продажба се околу 20 острови, а нивната цена може да се движи од неколку до над 100 милиони евра, во зависност од тоа дали има основна инфраструктура како вода за пиење, струја, а во некои случаи и објекти за јахтата. Најголемиот дел од островите не се воопшто развиени и комплетно се напуштени, пишува The Wall Street Journal. Најнов сопственик на остров во Грција е Екатерина Риболовлева, 25-годишната ќерка на рускиот милијардер Дмитри Риболовлев. Од неодамна нејзин е островот Скорпиос, кој го купи од внуката на Аристотел Онасис. Се претпоставува дека цената е 158 милиони долари. "По продажбата на Скорпиос и особено во последната година има зголемен интерес за пазарот на острови", посочува Александрос Мулас, агент за недвижности од Savills. "Обично со нас се поврзува посредник и името на реалниот инвеститор останува строго чувана тајна." Грција моментално располага со 6.000 острови и островчиња, и крајно компликувана процедура за продавање. Прво најголемиот дел од островите не дозволуваат градење и има тежок пристап до нив, а и да најдеш некој кој што ќе одговара има 32 бирократски чекори што треба да ги минеш, пред да добиеш дозвола. Меѓу условите треба да докажеш и дека нема да бидеш закана за националната безбедност на земјата. Островот Нисос во Јонското Море е оценет на околу 6,8 милиони долари, откако на него можат да се изградат шест куќи до 130 квадратни метри. Дополнителен проблем е што во Грција сите плажи се јавни. Исто така проблем претставува и тоа што дел од пустите острови не се комплетно ненаселени. Весникот ја пренесува приказната на грчкиот бизнисмен Јанис Перотис, кој откако купил остров во јонското море, на кој сакал да гради ресорт вреден над 300 милиони долари, потрошил повеќе од 2 години за да исели еден овчар и неговото стадо од островот. Освен тоа што голем број од сопствениците на острови (по наследство) заглавија во кризата, дополнителна инспирација за продавање е и тоа што Грција (под притисок на ММФ) годинава за прв пат воведе перманентен данок на недвижности. По една деценија, во која беа склучени само неколку трансакции, одеднаш приватниот остров станува поседување за кое многу сопственици не можат да си го дозволат луксузот да го одржуваат, објаснуваат експертите. "Имам муштерии кои ми бараат што е можно побрзо да продадат. Велат дека не можат да го издржат даночниот товар. Најголемиот дел од нив мразат што имаат наследено остров," објаснува за The Wall Street Journal еден од агентите за продажба во Крит. К.К.