Се враќа ли довербата на штедачите? Прочитајте со какво темпо се враќаат заштедите во банките
Објавено во: Финансии 21 Декември, 2016
На крајот на октомври иако бележи четиримесечен непрекинат раст депозитната база во домашна валута е 5 милијарди денари пониска од таа во март, а кај девизите заштедите на крај на октомври се минимално повисоки од тие во март годинава кога почна стампедото предизвикано од политичката криза
Полека се враќа довербата на граѓаните во домашните банки, разнишана од пролетниот удар предизвикан од политичката криза во земјава, ова го покажуваат најновите податоци што ги објави Народната банка на Македонија за движењата на орочените, штедните и девизните депозити на македонските граѓани. Нивото на заштеди во денари расте од јули до октомври непрекинато, а во истиот период од четири месеци без прекин расте и нивото на заштеди во странски валути. Ова го покажуваат податоците објавени на 14 декември во прегледот на депозитни институции објавен од централната банка.
Резидентите односно граѓаните на крајот на октомври во домашните банки и штедилници на крајот на октомври годинава чуваат вкупно до домашна и во странска валута заштеди во вредност од 163,81 милијарди денари односно 2,65 милијарди евра.
Нивото на граѓанските заштеди во домашна валута на крајот од октомври иако бележи подобрување сепак е далеку од нивото во март и тоа за 5 милијарди денари. Кај штедењето во странска валута доврбата е целосно вратена и дури нивото е повисоко од тоа во март, но тука влијае сигурно има и зајакнатиот американски долар.
Граѓаните извлекоа 110 милиони евра од банките во пролетната криза
Билансите на централната банка покажуваат дека во периодот март-јуни од банките граѓаните извлекле околу 110 милиони евра односно 6,8 милијарди денари. На месечно ниво најдрастично намалување имало на преодот од март кон април кога од денарската депозитна база биле извлечени околу 3,2 милијарди денари. Кај еврата паниката била помала и во тој период од депозитната база биле извлечени девизи во вредност на 1,05 милијарди денари. Во периодот од март до јуни од депозитната база во домашна валута имало намалување за 5,36 милијарди денари, а кај девизите во овој период има намалување од 1,44 милијарди денари.