Седнете пред да прочитате! Колку заработуваат нотарите?

Добивај вести на Viber

Штембил, печати потпис злато вредни! Од заверки на документи прават профити од десетици и стотици илјади евра. За една година заработуваат да купат еден стан. Тоа се македонските нотари. Најуспешниот меѓу нив лани направил профит од 255.000 евра, а уште 4 негови колеги направиле добивки еднакви или поголеми од 200.000 евра. Просечната профитна маргина изнесува 30% од остварените приходи. Зошто државата дозволува толку високи награди за овие чиновници?

Нотарскиот занает злато вреди во Македонија! И повеќе од тоа. Нема еснаф што има „помрсни профити“ ако се анализираат финансиските извештаи во Централниот регистар. Какви банкари, менаџери, директори... нотарите во Македонија заработуваат убедливо најдобро од сите.

Кога од најголемите 20 нотарски канцеларии во Македонија дури 13 лани имаат профит што изнесува барем 30 отсто од приходите тогаш нема дилема дека нотарството е бонбона бизнис.

Најтешко е да се дојде до лиценцата за нотар. Тоа е како државна концесија. Потоа е песна. Треба да најдете стан во кој ќе поставите бироа и шкафови, да накупувате принтер, компјутери, хартија, фасцикли и секако неговото височество штембил или печат кој злато вреди. Се по закон и согласно со Уставот. А парата почнува да тече како луда. Заверка на еден лист хартија 150 денари.

Не ви треба маркетинг – државен монопол сте. Не ви треба бизнис стратегија – само отворете ги вратите на канцеларијата, клиентите сами доаѓаат. Се што треба е минимум љубезност онака од општа култура. Секако и фискална сметка, за се да биде по закон...

Според достапни податоци од сајтот на Нотарската комора во нашата земја активно работат помалку од 200 нотарски канцеларии. Условите за тоа кој се исполнува услови да стане нотар може да ги видите на следниот линк http://nkrm.org.mk/index.php/uslovi-za-imenuvanje-na-notar

Најголемите 20 нотарски канцеларии лани оствариле кумулативен приход од своите услуги во вредност од 6 милиони евра. Заедничката добивка на овие 20 нотари за лани изнесува 2,15 милиони евра. Тоа е просек повисок од 30 отсто од осварениот приход. Па има ли друга ваква високопрофитабилна дејност?                                                           Р.Ф.