Шекеринска одговори на прозивките на ВМРО-ДПМНЕ за „Рекет“
Објавено во: Македонија 10 Август, 2019
Од кабинетот на министерката Радмила Шекеринска во изјава за тв24, децидно демантираат било каква вмешаност на Шеќеринска со Рекет и го повикаа обвинителството да ја интензивира истрагата.
„Раководам со стратешки важно Министерство, дел сум од Влада која им објави „војна“ на криминалот и корупцијата и ги разбирам потребите за дисквалификации и неосновани напади, но најодговорно се спротивставувам на оркестрираните обиди да се стави знак на еднаквост меѓу криминалците и оние кои не се тоа, меѓу корумпираните и оние кои избрале да работат чесно“, стои во реакцијата на Шеќеринска.
Во реакцијата на Шеќеринска, се посочува и дека, тоа што двајцата осомничени биле во притвор од моментот кога се отвори случајот е показател дека Владата не заштитува никого и дека ја поддржува истрагата на обвинителството.
Претходно од ВМРО-ДПМНЕ прашаа која е улогата на вицепремиерката и министерка за одбрана Радмила Шеќеринска во случајот „Рекет“?
„Власта треба да одговори и каква е замешаноста на Радмила Шекеринска која се споменува во видеото и дали таа знаеле или можеби и учествувала во милионскиот рекет. Се наметнува и прашањето дали и други лица од власта биле во релација со Боки 13 и која била нивната улога?“, изјави генералниот секретар на ВМРО-ДПМНЕ, Игор Јанушев.
Партијата новите снимки ги поврзува со Шеќеринска, затоа што во еден од разговорите, Бојан Јовановски и Орце Камчев зборуваат за „Бобо“ и неговата сопруга.