СИКОРСКИ ДАДЕ ПРЕДЛОГ ЗА СТАТУСОТ НА КРИМ: Се налутија и Русите и Украинците

Добивај вести на Viber

Полскиот шеф на дипломатијата Радослав Сикорски предложи решение за Крим, што ги налути и Украинците и Русите. 

Според него, Украина и Русија не можат да се договорат за статусот на Крим, па затоа е потребна интервенција на меѓународната заедница.

„Ние би можеле да го ставиме Крим под мандат на ОН со мисија да подготви фер референдум откако ќе провери кои се легалните жители и така натаму. Можеме да го одложиме тој референдум за 20 години“, предложи тој.

Меѓународната заедница, вклучително и Полска, не ја признава руската анексија на Крим во 2014 година. Самиот Сикорски ја потврди таа позиција во февруари оваа година. Советот на Европската унија на 17 јуни донесе одлука за продолжување на санкциите против Русија кои беа воведени како одговор на „нелегалната анексија на Крим и градот Севастопол“.

Украинското Министерство за надворешни работи соопшти дека компромисите за територијалниот статус на Крим се неприфатливи. Беше нагласено дека територијалниот интегритет на Украина „никогаш не бил и не може да биде предмет на дискусија или компромис“.

Украинците изјавија дека очекуваат поддршка од нивните партнери за да ја принудат Русија да се повлече од Крим и да ги изведат пред лицето на правдата за кршење на меѓународното право и сторени злосторства.

Портпаролот на Кремљ, Дмитриј Песков, исто така го отфрли полскиот предлог, нарекувајќи ја „апсурдна“ идејата за одржување „втор референдум за статусот на регионот во последните 20 години“.

Инаку, турскиот претседател Реџеп Таип Ердоган изрази поддршка за Кримските Татари и кажа дека Крим треба да се врати на Украина.