Синдикатот на „Југохром“ бара комбинатот да продолжи со работа

Добивај вести на Viber

Претставници на Синдикатот на вработените во „Југохром Алзар“денес, ќе предадат писмо – ургенција до Второстепената комисија на Владата, како охрабрување и поттик комисијата да одговори позитивно на жалбата против, според нив неоправданото искучување од работа на фабриката.

Во писмото се бара Второстепената комисија веднаш да ја укине донесената одлука од страна на Државниот инспекторат за животна средина за исклучување на печките на „Југохром Алзар“. 

Доколку комисијата, како што се вели во соопштението, не покаже чувство за реалноста од 1 јануари 2017 година 700 вработени и нивните семејства ќе останат без основна егзистенција. 

Синдикалната организација на „Југохром Алзар“, во писмото, инсистира и државните институции да направат анализа кој вистински го загадува Тетово и колкав е процентот на материи кои се испуштаат од комбинатот, а менаџерскиот тим со уште побрзо темпо да продолжи со изградба на системот за отпрашување. 

„Југохром“ ги изгаси печките на почетокот од ноември по одлука на Министерството за животна средина кое посочи дека компанијата ги пробила роковите за изградба на пречистителна станица за издувните гасови кои го загадуваат воздухот во регионот.
Од тогаш, неколкупати вработените во фабриката протестираа, со цел да се рестартира фабриката, а тие да се вратат на работа.