ПАЛЕВСКИ ПОДНЕСЕ ПРИГОВОР ЗА ЛИСТАТА НА ДОКАЗИ: Три дена пред убиството, обвинетите со автомобилот на Панче поминале кај зградата на Вања

Добивај вести на Viber

Обвинетите за грабнувањето и убиството на 14-годишната Вања Ѓорчевска oд Скопје, со „цитроенот“ на убиениот Панче Жежовски од Велес, дошле пред зградата на девојчето и на 24 ноември 2023 година (петок). Тоа се случило на три дена пред злосторството.

Обвинителките денеска продолжија со изведување докази против обвинетите Љупчо Палевски, Велибор Манев, Боре Видевски и Влатко Кешишев. Презентирани беа снимките од системот „Безбеден град“ на полицијата. На 24 ноември 2023 година и на 27 ноември 2023 година возилото „цитроен“, со кое е киднапирана Вања, се движело по иста траса од мостот „Гоце Делчев“, пред Владата, лево кон булеварот Свети Климент Охридски, па десно кон улицата Орце Николов, па преку улицата Михаил Цоков, до улицата Наум Наумовски Борче каде што живееше девојчето. Во петокот на 24 ноември 2023 година „цитроенот“ стигнал пред зградата на Вања во 6.50 часот. Во понеделникот на 27 ноември 2023 година „цитроенот“ стигнал пред зградата во 6.36 часот. Во возилото на снимките се забележуваат силуети на три лица.

Во петокот на 24 ноември 2023 година „цитроенот“ тргнал кон Центар од населбата Маџари. Потоа, вечерта на 25 ноември 2023 „цитроенот“ бил преместен во Бутел, од каде тргнал утрото на 27 ноември 2023 година.

Обвинителката презентираше и видео снимки од 27 ноември 2023 година од бензинска пумпа.

„Се гледа како обвинетиот со празен галон, големо пластично шише, стасува на бензиската која се наоѓа кај Транспортниот центар, во близина на партијата Десна, за да наточи бензин. Плаќа со банкнота од 1.000 денари, за што му е издадена фискална сметка. Времето е од 5.26 до 5.30 наутро. Во 5.30 се гледа како Кешишев го зема шишето и заминува“, објаснува обвинителката.

Во друго видео обвинителката покажа „мерцедес“, сопственост на Велибор Манев, како се движи на 20 ноември 2023 во 9.29 часот, од булеварот Гоце Делчев, врти лево, поминува пред „Ист гејт мол“ и продолжува по улицата Беласица. Во возилото имало две лица. Засега не е јасно зошто ова видео е од важност за случајот, затоа што е снимено една недела пред убиството на Вања.

Првообвинетиот Љупчо Палевски поднесе приговор за листата на докази.

„Имаат листа од 197 докази, на кои судот парцијално обрнува внимание, и не забележува дека има дуплирани докази“, вели Палевски.

Тој најави дека на следното рочиште ќе побара изземање на Обвинителството. Судењето за двојното убиство продолжува во понеделник на 27 јануари. Палевски лани беше уапсен во Турција, во Баликесир откако избега од Македонија.