СКЕНИРАЧИ ЈУРИШ: Мој ДДВ е усогласена, сепак ќе има скенирање до 2.100 денари

Добивај вести на Viber

Откако „Фактор“ утринава објави дека апликацијата Мој ДДВ има проблем и не дозволува скенирање над досегашните 1.800 денари, апликацијата е усогласена со новите измени, па граѓаните ќе можат да скенираат, без да навлегуваат во надминат износ.

Со соопштение дека апликацијата е прилагодена излезе и Управата за јавни приходи.

„Управата за јавни приходи ги информира корисниците на апликацијата МојДДВ, дека е извршено нејзино прилагодување согласно измените и дополнувањето на Законот за враќање на дел од данокот на додадена вредност за физички лица објавен во Сл.весник на РСМ бр.65/2023 објавен на ден 23.03.2023 година. Ова значи дека сите корисници на МојДДВ, ќе треба да ја превземат новата верзија на апликацијата од Playstore, Appstore и Huawei appgallery. Измените веќе се видливи во апликацијата МојДДВ во верзијата 2.1.6. Исплатите со зголемен максимален износ од 2.100 денари по корисник за скенираните фискални сметки во првото тримесечје од годинава ќе се реализираат во мај.Во моментов апликацијата МојДДВ, ја користат 523 673 граѓани a бројот на нови корисници секојдневно расте. Од почетокот на мерката до денеска, кај граѓаните се вратени близу 6 милијарди денари“, се вели во соопштението од УЈП.

На граѓаните не им беше јасно како да скенираат, бидејќи, кога ќе се отвореше апликацијата, секоја скенирана сметка што беше над лимитот од 1.800 денари, ја покажуваше во надмината состојба со црвена боја. Така се оставаше впечаток дека залудно се скенираат сметки, иако износот од повратот се пресметува над тие 1800 денари. 

Сепак, сега апликацијата е усогласена, и граѓаните до крајот на месецов можат слободно да скенираат до лимитот од 2.100 денари. 

Р.Ф.