Главниот град ја зголемува бројноста и интелектуалната моќ на сметка на внатрешноста

Добивај вести на Viber

Вкупно 2.575 македонски државјани од внатрешноста, односно од други градови, општини и населени места го промениле местото на живеење во личната карта и станале скопјани во 2017-та, покажува најновата публикација на Заводот за статистика на РМ според податоците кои се добиваат од подрачните единици на Министерството за внатрешни работи на Република Македонија.

По скопски општини, убедливо најмногу се доселиле во Аеродором и нивниот број изнесува 630. Втор на листата е Карпош со 360, а блиску се Кисела Вода и Центар. За споредба, во другите градови најмногу новодојденци-македонски државјани има во Гостивар (586), а дури потоа се Куманово (416), Охрид (391), Струга (354) и Битола (330).

Кај новопечените скопјани најмногу  се дојдени од Битола (94), а следуваат Охрид (86), Прилеп (83), Тетово (81), Велес  (74), Гостивар (72), Куманово (67), Кичево (62), итн.

Запрашани за причината поради која се доселиле и се регистрирале како скопјани, од нив 818 одговориле заради склучување брак, кај 663 мотивот бил семејните причини, 661 рекле дека немаат посебни причини односно поради повеќе причини, 340 дошле за вработување, а само 24 се заради школување што е разбирливо ако се знае дека на возраста на која обично трае образовниот процес  речиси сите се регистрирани како граѓани на други населени места.

Меѓу сите нив, доминира завршеното  високо образование кај 1.020, а кај дополнителни 250-мина се со магистратура. Како стручњаци и научни работници, според професија, се декларирале 1.002-ца.

По етничка припадност, 2031 се Македонци, додека 291 се Албанци.

Според родот, 1.552 се женски пол, додека 984 се машки.