СО ПРЕТРЕСОТ НЕ СЕ ЗНАЕЛО ШТО СЕ БАРА - Јовески откри „пикантерии“ за чешлањето на Финансова

Добивај вести на Viber

Не можев да ја трпам незаконитоста во предметот. Во наредбата не се знае што се бара. Многу пропусти ме принудија да постапам на тој начин. Ова го кажа републичкиот јавен обвинител, Љубомир Јовески во гостувањето на Телма осврнувајќи се на претресот во Финансова полиција. Овој случај ја брануваше јавноста, но доведе и до суспендирање на поранешната шефица на обвинителството за организиран криминал, Вилма Русковска, за која е предложено разрешување од страна на дисциплинската комисија. 

- По тој предмет имаше само една анонимна кривична пријава која подолг период седела во фиоката на Русковска. Кога прв ден замина на одмор дејствијата за наредба на претрес ги препуштила на обвинителката Ивана Трајчева, без да има преземено никакво претходно дејство по анонимната пријава. Во наредбата стои кривично дело примање награда за незаконито влијание, но од анонимната пријава немаше елементи за вакво кривично дело – рече Јовески.

Според него, во Финансова полиција било влезено од страна на обвинителот, без да се знае кој предмет се бара.

- Се барале предмети за 4 до 5 години наназад, што значи дека обвинителството нема никакви сознанија за ова и за други дела. Со претресот не се знаело што се бара. Не можев да ја трпам незаконитоста во тој предмет. Во наредбата не се знае што се бара. Многу пропусти што ме принудија да постапам на тој начин. Долго време размислував дали да покренам постапка – рече Јовески.

Тој појасни дека на судот кој ја дал наредбата за претрес, му биле дадени погрешни информации од страна на обвинителот.

Русковска неодамна на интервју рече дека според истражителите кои биле на претресот, првиот човек на кој директорот на Финансова, Арафат Муареми, му се јавил кога дознал за претресот, бил републичкиот јавен обвинител. На, Јовески вели дека комуникацијата била службена, со оглед на институциите со кои раководат.

- Не ми се јави директно, се јави во обвинителството, од обвинителството ми пренесоа дека поднел телефонска поплака. Без разлика дали се јавил или не, во ниту еден момент не презедов никакво дејство додека траеше претресот, ниту да го насочам, ниту да го спречам – рече Јовески, и појасни дека поплаката се однесувала на недолично однесување на некои истражители.

Русковска исто така рече дека откако беше суспендирана, сведоци во предметот се плашат да дадат исказ. Јовески на ова рече дека таа не се пожалила за тоа во обвинителството.

Наспроти изјавата на Русковска дека хајката против неа почнала кога го отворила предметот против Рашковски, Јовески рече.

- Истрагата за Рашковски ја води обвинителката Ивана Трајчева, она е реизбрана за обвинител во обвинителството за организиран криминал и корупција после отворањето на двете постапки против Рашковки. Ако имало притисоци и калкулации во тој предмет Ивана Трајчева не би била повторно избрана. Обвинителството работи неселективно – дополни Јовески.