Со речиси половина милион евра ќе се подобрува работењето на НБРМ

Добивај вести на Viber

Европската централна банка во партнерство со националните централни банки на евро-системот, го започна спроведувањето на проектот „Анализа на потребите на НБРМ“  во соработка со централната банка на Македонија.

Со „Деветмесечниот проект за анализа на потребите“, кој е финансиран од ИПА инструментот на ЕУ,  ќе бидат утврдени областите во кои НБРМ би можела да оствари напредок во текот на наредните години во поглед на постигнување на стандардите за централните банки во ЕУ.  Овие резултати ќе овозможат НБРМ да ја оформи својата идна стратегија за приклучување кон Европскиот систем на централни банки, а потоа и кон евро-системот, по пат на ревидирање на законската рамка, усвојување и спроведување нови политики и практики или обука на кадарот. На состанокот партнерите во проектот се договориле за методологијата што ќе се користи при анализата на потребите, што ќе покрие десет различни области како сметководство, банкноти, економска анализа и истражување, човечки ресурси, информатичка технологија, внатрешна ревизија, правни услуги, монетарна политика и политика на девизниот курс, платни системи и статистика, соопштија од  НБРМ. Проектот почна на 15 октомври 2012 година, ќе го спроведува ЕЦБ во партнерство со централните банки на Германија, на Естонија, на Ирска, Шпанија, Италија, Малта, Холандија, Австрија, Словенија и на Словачка. Централната банка на Бугарија, исто така, ќе обезбеди експерти за проектот. Проектот е финансиран од Европската унија, што додели 405.000 евра од Инструментот за претпристапна помош и НБРМ, која обезбеди 45.000 евра како кофинансирање.