СОПСТВЕНИЧКИТЕ БРАНУВАЊА ВО „ГРАНИТ“ НЕ ЗАПИРААТ - за еден ден помина блок од милион евра, Зоран Милковски претходно докупил 0,2 отсто од акциите

Добивај вести на Viber

Продолжуваат акционерските прегрупирања во нашата најголема градежна компанија „Гранит“. Акционерското друштво, преку ценовно чувствителна информација на Берзата, вчера соопшти дека дел од членовите на Управниот одбор и Надзорниот одбор, се стекнале со акции од компанијата.

Како што информираат оттаму, со најмногу акции се стекнал Зоран Милковски, генерален директор, член на Управниот одбор, како и син на долгогодишниот прв човек на компанијата Страшо Милковски. За Зоран Милковски се наведува дека се има стекнато со 7.077 акции на „Гранит“, што според пресметките, претставува околу 0,23 проценти од капиталот на компанијата.

Натаму, Катерина Ѓердовска, членка на Управниот одбор се стекнала со 778 обични акции, додека, пак, Виолета Божиновска, членка на Надзорен одбор, се стекнала со 926 обични акции од градежната компанија.

Со оглед што обврската за известување од компаниите за промени во акционерската сопственост кај членовите на управниот и надзорниот одбор е за неколку дена, се претпоставува дека овие акции биле купени во претходната недела.

Всушност, на 18 октомври се реализираше блок трансакција, во која поминаа 0,2 отсто од акциите на „Гранит“ или 6.280 акции, по цена од 1.450 денари за акција, што е вкупна сума на трансакцијата од 9,1 милиони денари или 148 илјади евра.

Вчера, пак, со акциите на „Гранит“ се реализираше уште една блок трансакција, во која беа купени 1,41 отсто од акциите на компанијата. Како што соопшти Берзата, цената по која се продала една акција изнесувала 1.450 денари, или за купени 43.200 акции, биле платени 62,6 милиони денари, односно малку повеќе од еден милиони евра.

Со акциите на „Гранит“ се тргуваше и на класичниот пазар, и во текот на вчерашниот ден поминаа 546 акции на компанијата, по просечна цена од 1.362 денари за акција, што значи дека беа продадени акции за околу 12 илјади евра.

Фактор пред неколку дена објави дека досегашниот најголем институционален инвеститор во компанијата Сава пензиски фонд одлучи да ги продаде своите 7,5 отсто од акциите, за 5,6 милиони евра. Се уште нема јавна потврда за тоа кои се новите сопственици на овие акции, затоа што се најмалку двајца и не го исполнуваат законскиот услов по кој мора јавно да се обелоденат новите сопственици

Оваа трансакција доаѓа набрзо откако во претходниот период имаше повеќе купопродажби во кои менаџерите на „Гранит“ предводени од Страшо Милковски, долгогодишен директор и сега претседател на УО на компанијата, купија околу два отсто од сите акции.

Тоа ги разгоре дилемите дали овие акционерски поместувања се можеби во функција на консолидација на актуелната раководна структура во очи на претстојни можни ангажмани на „Гранит“ во проекти на „Бехтел и Енка“. Тој конзорциоум треба да гради три автопатски патни правци во земјава, а како што се зборува, нивен прв избор на нашиот пазар би бил „Гранит“, најголема и реномирана домашна градежна компанија, и во такви услови на преговарање за деловна соработка би биле многу значајни позициите кои се имаат во „Гранит“.

Инаку, согласно последно објавената состојба од Централен депозитар, Зоран Милковски поседува 8,77 отсто од акциите на „Гранит“, Ивана Милковска-Симева има 8,84 отсто, а самото друштво поседува 9,81 отсто обични акции.