Совет на НБРМ: Ќе се издвојува посебна резерва од МБПР

Добивај вести на Viber

Денеска Советот на Народна банка на Република Македонија(НБРМ) ја донесе одлуката за методологијата за утврдување исправка на вредноста, односно за издвојување посебна резерва од страна на Македонската банка за поддршка на развојот (МБПР). „Раководејќи се од специфичниот статус и задачите на МБПР, утврдени со Законот за МБПР, Советот на НБМ пропишува посебна методологија за исправката на вредноста, односно за издвојување посебна резерва од страна на МБПР. Со ова всушност се врши усогласување со одлуката за управување со кредитниот ризик, донесена во март 2013 година, со одредени исклучоци, имајќи ги предвид специфичните активности кои ги врши Банката“, стои во соопштението од НБРМ. На седницата е донесена и Одлука за начинот како другите финансиски институции ги доставуваат статистичките информации и податоци. Според соопштението , со донесените измени за известувачи се опфаќаат и друштвата даватели на финансиски лизинг и финансиските друштва, со што се постигнува речиси целосна покриеност во рамки на извештаите на монетарната статистика за целиот финансиски систем. Исто така, посочуваат од НБРМ, на седницата е донесена и Одлуката за начинот, постапката за издавање, формата, содржината и располагањето со кованите пари за колекционерски цели, со која всушност се доуредуваат одредбите од постоечката одлука донесена од страна на Советот на Народната банка во март оваа година. „Заради натамошна афирмација на земјата и за збогатување на Нумизматичката збирка на Народната банка, во текот на изминатите неколку месеци Народната банка започна со подготвителни активности за издавање ковани пари за колекционерски цели, поради што се наложи потребата од попрецизно регулирање на статусот, издавањето и располагањето со кованите пари за колекционерски цели“, посочуваат од банката.