Советот на НБРМ воведува нова методологија за благајничките записи

Добивај вести на Viber

За време на денешната седница Советот на Народната банка на Република Македонија донесе нова Одлука за благајничките записи. Со неа се воведува методологијата за утврдување на потенцијалната побарувачка за тие записи. Како што укажа НБРМ, изминатиот период на аукциите е забележана значително повисока побарувачка за благајнички записи во однос на реално расположливите ликвидни средства кај банките, поради нивната намера да го зголемат сопственото учество во вкупниот износ на благајнички записи. „Согласно со поставениот механизам, доколку на ниво на вкупниот банкарски систем се утврди дека постои повисока побарувачка од потенцијалната, банките кои што аукцираат со повисоки износи од сопствениот ликвидносен потенцијал, ќе имаат обврска разликата во однос на потенцијалот да ја пласираат во депозити со рок на достасување од седум дена“, соопшти НБРМ. Според Народната банка, со новините од одлуката се очекува усогласување на понудата и побарувачката за благајнички записи и соодветно насочување на вишокот ликвидни средства во банкарскиот систем во земјава. „Во согласност со новините кај Одлуката за благајнички записи, направени се и дополнувања кај Одлуката за расположливи депозити со кои се овозможува пласирање средства во депозити со рок на достасување од седум дена во услови на повисока побарувачка за благајнички записи од потенцијалната“, стои во соопштението. Советот на НБРМ донесе и одлука за известување за пондерираните каматни стапки на дадени кредити и на примени депозити со која целосно се усогласува статистиката на каматните стапки со регулативата за статистиката на каматните стапки на ЕЦБ , а  ја измени и Одлуката за задолжителната резерва. Заради натамошно користење на расположливите инструменти, како и со цел да се поттикне поактивно користење на предностите коишто ги овозможуваат донесените макропрудентни мерки, е одлучено Народната банка да не плаќа надомест на задолжителната резерва. Усвоена е и Одлука за условите и начинот под кои резидентите можат да склучуваат кредитни работи во девизи и да вршат плаќања врз основа на тие кредитни работи.