Спречен шверц на јагниња наменети за извоз во Албанија

Добивај вести на Viber

Инспекциските служби на агенција за храна и ветеринарство (АХВ), во соработка со припадници на Министерството за внатрешни работи (МВР) во текот на вчерашниот ден спречиле нелегален промет на јагниња, чија крајна цел била илегален извоз во Република Албанија.

- Во координирана акција со инспекторите МВР, возилото со кое се транспортирале јагнињата  е стопирано од полициски службеници во Струга и по спроведена контрола од страна на инспектори од АХВ, утврдено е дека станува збор за 63 јагниња кои не се идентификувани согласно Законот за идентификација и регистрација на животните, а транспортерот не поседувал и сертификати за здравствена состојба на животните - наведуваат од Агенцијата во соопштението испратено до медиумите. 

Притоа појаснуваат дека, согласно дадената изјава на транспортерот животните се со потекло од населено место во Прилеп.

- Согласно одредбите од Законот за инспекциски надзор, јагнињата се одземени од лицето кое ги транспортирало и се предадени на Агенцијата за управување со одземен имот.

Против  транспортерот ќе биде поднесена прекршочна санкција за движење на неидентификувани животни без документи за движење - посочуваат од АХВ.