„СПРЕЧЕТЕ ТРГОВСКА ВОЈНА, СИТЕ ЌЕ ИЗГУБАТ“: Германските гиганти на нозе

Добивај вести на Viber

Германските производители на автомобили, по гласањето во Европската унија што ја отвори вратата за казнени царини за увоз на кинески возила, повикаа на преговори и избегнување на трговска војна.

Фолксваген апелираше до Европската комисија и кинеската влада „конструктивно да ги продолжат преговорите во потрага по политичко решение“.

– Спречувањето на заштитните тарифи и избегнувањето трговски конфликт мора да биде заедничка цел – се наведува во соопштението на групата. Во исто време, решението мора да биде на маса пред крајот на месецот и стапувањето во сила на европската мерка, пренесува dpa.

– Планираните тарифи се погрешен пристап и таквиот потег „нема да ја подобри конкурентноста на европската автомобилска индустрија – предупреди Фолксваген.

БМВ укажа и на негативните последици од царините. „Гласањето е фатален сигнал за европската автомобилска индустрија“, изјави директорот на компанијата Оливер Ципсе.

– Сега е неопходно Европската комисија и Кина брзо да најдат решение и да спречат трговска војна која на крајот ќе донесе загуби за сите – додаде Ципсе.

Малку порано, мнозинството членки на Европската унија гласаа за воведување казнени тарифи за електричните автомобили од Кина, со стапка до 35,3 отсто, објави ДПА повикувајќи се на извори. Германија беше против тоа.

Кина е важен пазар за германските производители и евентуална царинска војна дополнително ќе ги продлабочи нивните проблеми.