Србија: Повеќе менаџери отколку селани

Добивај вести на Viber

Србија во текот на последната деценија загуби половина од своите земјоделци, шумари, риболовци и граѓани кои се занимаваат со слични занимања. Истовремено, речиси е дуплиран бројот на граѓани кои се уметници и експерти во различни области, како и трговци и вработени во услужните дејности. Ова го покажуваат најновите податоци од истражувањето за занимањата на граѓаните кое врз основа на пописот на населението од 2011 година, го спроведе Републичкиот завод за статистика (РЗС). Резултатите покажуваат и дека најголем број од Србите имаат титула инжинери, стручни соработници или техничари. Работници без квалификација во Србија, според пописните резултати, има 183.000, додека честа на занаетот ја бранат нешто повеќе од 312.000 граѓани. Титулата инжинер, техничар и стручен соработник ја носат 372.000 граѓани, додека на администрацијата припаѓа 170.000 од попишаните луѓе. Со земјоделски и други „рурални“ занимања се занимаваат 270.000 Срби. Дека резултатите од пописот ги потврдија трендовите кои веќе со децении се очигледни, смета и економистот Александар Жикиќ и напоменува дека ваквата „крвна слика“ на занимања во Србија е последица на повеќегодишната економска криза, нерационалното школување на кадри, одлив на мозоци, но и внатрешните миграции. „Очигледен е процесот на напуштање на селските средини, па логично е и што има се помалку земјоделци и слични занимања. Од друга страна, очигледно е зголемувањето на занимањата од кругот на менаџерските работи, иако се доведува во прашање нивниот степен на стручност и оспособеност. Зголемениот број на трговците и занимањата од услужниот сектор е последица на замреното земјоделство и лошиот деловен амбиент“, објаснува Жикиќ за Новости. А.А.